March 8, Nilai zan khan UEFA Champions League (UCL) last 16, second leg khelh chhunzawm a ni a. Mimualah si khat faia tlawm tawh Tottenham chuan an mualah hnehna an chang zo lova, quarter-final lut zo lovin an tla. Inkhel dangah Bayern Munich chuan khawvela player ropui pathum; Lionel Messi, Kylian Mbappe leh Neymar te kawl khawmtu Paris St-Germain chu si hnih faiin an hneh nawn leh a, quarter final lut zo lovin an tla ve bawk.
London club lian Tottenham hian khelh that chang neiin, EPL lamah pawh palinaah awm mek mahse Antonio Conte hnuaiah beisei phak lo taka inlan a, chak loh khut an ching thin a. Europe a football club te inelna lian ber Champions League-ah quarter-final lut zo lovin an tla zui leh ta bawk si a. Season kal mekah trophy lak theih beiseina an neih chhun chu a tham ral leh ta phawt a. Champion na nei lovin season an hmang zo leh dawn niin a ngaih theih leh ta hial a ni.
San Siro-ah si khat faia tlawm tawh Spurs hian an Mikhual AC Milan hneh letin, hnehna chan ngei tumin thapui an thawh a. An mualah thih tha tak meuh meuhin tan khawh bawk mah se hun tawp thlengin goal an thun thei lo. Spurs tan hian Pierre-Emile Hojbjerg chuan tha takin pet bawk mahse AC Milan keeper Mike Maignan chuan tha takin a lo dansak a, Spurs hun tha a tihthlawnsak. Spurs tana goal thun hnem Harry Kane chuan tauh luh theihna hun tha nei bawk mahse goal pawnah a tauh chhuak tlat thung a, a hun tha a hlah ve bawk.
London club lian goal thun tumin thapui an thawh a, na taka an khingpuite an nawr laiin hun tawp dawn hnaih minute 77-naah an defender rinrawl Cristian Romero chuan yellow card a hmu nawn leh a, hnawhchhuah a ni. Chak mamawh tak chungin kim lo zawk an ni hian an tan chet a tiharsa leh zual a, hun tawp thlengin goal an thun theih loh phah ta a ni.
Tam zawk ni chungin inlan mah se AC Milan pawhin an hmahruaina tizau turin goal an thun thei bik chuang lo thung. Liverpool player hlui Divock Origi chuan goal post a pet per a. Tunlaia fprward chetha Rafael Leao pawhin a hun tha neih a hlah ve bawk. London-ah goal thun thei lo mah se an mualah si khata an lo chak tawhna an chhawr tangkai a. Serie A club lian AC Milan hian si belhkhawmah 1-0 in hnehna an chang, quarter-final an lut.
An mualah AC Milan an mikhual tum hian dam loh vanga team kaihruai thei lo reng Antonio Conte chuan Tottenham a kaihruai leh thei ta a. Team kaihruai tura a let lehnaah goal an thun zawh loh vangin inelna ngaihhlut hlawh tak Champions League atangin an tla a, an puanthuah an tel zui ta a ni.
UCL atangin Tottenham an tla
![](https://theaizawlpost.org/wp-content/uploads/2023/03/uc.jpg)