UD&PA leh PHE department tangkawpten kar hnih chhung awh tur faina beihpui thlakna Swachhata Hi Seva 2024 programme leh faina hnatlang an buatsaih chu nimin khan UD&PA minister K.Sapdanga’n a hawng a, hnatlangah a tel zui nghal.
Kumin Swachhata Hi Seva, 2024 thupuiah hian, Swabhav Swachhata (Innate Cleanliness), Sanskaar Swachhata (Cleanliness of thought, Value and culture) tih hman a ni.
Minister Sapdanga chuan, faina beihpui hrang hrang kan thlak hian, a beihpui kan thlak hun chhung chauha fai tur kan ni lova, a kamkeu-na leh khuh hawnna ang chauha ngaih zawk tur a ni, a ti a. Engtik lai pawha fai reng tur kan ni tiin, mimal, pawl leh department ang pawha tun aia nasa lehzuala tan la turin a sawm nghal a ni.
Swachhata Hi Seva 2024 hawnna programme hman zawh hnu hian Cleanliness Shramdaan (Faina Hnatlang) neih zui niin, hnatlangte chu group thumah inthenin, MYC kalkawng dunga bawlhhlawh chhar a phiah fai bakah hnim hnawk te samfai a ni a. UD&PA leh PHED staff te bakah Maubawk Branch YMA leh Save the Riparian te he Faina hnatlangah hian an tel a ni.
Swachhata Hi Seva Campaign hi Ministry of Housing and Urban Affairs (MoHUA) leh Department of Drinking Water and Sanitation (DDWS) te \angkawpa hmalakna niin, Swachh Bharat Mission kum 10 tlin denchhenin September ni 17 a\anga October ni 2, Gandhi Jayanti thlengin he Campaign hi neih tur a ni a. Hemi hun chhung hian Faina leh Thianghlimna kawnga beihpui thlakna India ram pum huapa neih tur niin, Mizoramah pawh district khawpui bakah notified towns leh thingtlang khua zawng zawngah Faina Beihpui thlakna lian tak neih a ni ang.
Mizorama he campaign a hlawhtlin theih nan hian Chief Secretary kaihhruaina hnuaiah State Steering Committee din niin, District tinah Deputy Commissioner-te kaihhruaiin District Steering Committee din vek a ni.
UD&PA minister-in faina beihpui thlak hawng
