Mizoram University hnuaia under graduate exam result tihchhuah taka Arts, Science, Commerce leh Home science stream gold medalist ho chu MZP Gen. Hqrs chuan Thawhlehni zan khan lawmpuina a hlan.
Lawmpuina hi minister PC Vanlalruata leh adviser to chief minister Lalmuanpuia Punte, MLA ten an hmanpui a. Minister chuan central service a Mizote dinhmun thlirin a lungawi thlak loh a, kan hnam tan pawh a lungngaihthlak a, zirna kan ngaihsan viau rualin top level-ah duhthu kan sam lo hle tiin a sawi. Nationalism-ah kan chian a tul a, state danga kan tribal puite central service-a kan tluk lo lutuk chu thangthar zawkte kan tan a ngai takzet tih a sawi a ni.
MZP vice president C Lalremruata pawhin Mizorama central sawrkar department awmte, hnamdang head of department-a awm ten ram leilung fa Mizote tham lo tak leh hmusit taka chetna tam tak awm leh hnalakah pawh hnamdang duhsak zawk leh dan diklo taka hnaa thun tum an awm chu MZP chuan a remti dawn loa, a enzui zel dawn a ni tih a sawi. Sawrkarin Right to Education Act hnuaia school naupang lehkhbu a sem thin chu zirlai tam takin an la dawng loa, school 700 chuang lehkhabu la dawng kim lo an awm, tiin, thuneituten a ranglama hma la turin an ngen tih a sawi bawk.
UG exam 2024-ah hian arts-ah Lalhlimpuii, Economics (Pachhunga University College), science-ah Lalhriatzuala, Chemistry (Pachhunga University College), commerce-ah David R Lalhumhima, (Pachhunga University College), home science-ah Gracy Lalruatthari (Govt. Zirtiri Residential Science College) te chu gold medalist an ni a. Thilpek dang bakah sumfai Rs.5000 hlan an ni.
UG exam-a gold medalist chawimawi
