Uganda National Drug Authority te chuan HIV damdawi chu ran vulh tihthau nan hman a ni tih kum 2014 khan an hre daih tawha mahse mipui te an hriattir lo tiin sawi a ni.
Regulator’s senior drugs inspector Amos Atumanya chuan parliament hnenah anti-retrovirals te chu vawk leh ar te tihthau nana hmana pek thin a nih thu a hrilh a.
Atumanya chuan mihring tan chuan he damdawi hi kan thil eiah tlemte chauh ei pawhin a hlauhawm a ni tiin a sawi a. Mahse, NDA chuan chhanna mumal a la siam miah lo thung.
NDA thupuangtu chuan hriselna atana hlauhawm a awm a nih chuan mipuite an hrilhhria ang a ti a, NDA hna chu damdawi enfiah niin ran chaw enfiah a ni lo a ti bawk.
Tun hnaiah Makerere University te chuan zirchianna an neih an tihchhuahah ar leh vawksa an enfiah 50% ah te chuan anti-retroviral drugs hmuh a ni an ti a. Heng sate hi capital Kampala leh hmar lam khawpui Lira a mite an enfiahna a ni a.
Uganda’s House Committee on HIV/Aids hmaa a inlannaah Atumanya chuan National Drug Authority te chuan kum 2014 daih tawh khan animal farm-ah anti-retrovirals (ARVs) hman a nih leh nih loh an enfiah tawh thu a sawi a. An report pawh an tihchhuah ngei thu leh mahse mipui mimir hriatah fimkhur tura chahna an tichhuak lo a ti a, a chhan ber chu an ram food export a tihchhiat vek theih vang a ni tiin a sawi a.
“Chuvang chuan thil awm dan enfiaha chinfel theih nan kawng dang kan zawng a ni” tiin a sawi.
Makerere University’s College of Health Sciences te chuan vawk anti-retroviral drugs pek te chu an thang chak em em a, hralh an tling vat thin tiin sawi a. Mahse, Atumanya chuan chu chuan mihringah harstana nasa tak a thlen zui thei a ti a.
“ARVs resistance i nei thei a. Nakin zelah mamawh hun i neih chuan i tan ARV a thawk thei dawn lo,” tiin a sawi bawk.
Uganda-ah mipui maktaduai 1.4 vel zet chu HIV kai niin, anti-retrovirals te hi a hma pawhin African swine fever enkawl nana hman a ni tawh a, Pig Ebola tih mai niin tun thlengin a tihdamna tak tak hriat a la ni lo. Hei bakah hian ARVs te chu ar a Newcastle disease enkawl nan pawh hman a ni bawk.
Uganda ar leh vawk te HIV damdawi pe
