British Interior Minister Suella Braveman chuan UK-a in leh lo nei lo tam tak ten Puan In kaiha khawsak an uar lutuk ta chu tihtawp a tul hle ni a hriain puan in hmang thei tur chin bithliah fel tak siama dan thar duan chhuah a intiam a, mi tamtak chuan puan in kaih hi an mamawh em em vang pawh ni loin lifestyle anga an ngaih vang mai niin a sawi.
India chhul chhuak minister chuan X-a a post-naah sorkar chuan in nei lo tak tak te erawhchu a tanpui zel ang tiin a sawi a. “British mipuite chu mi khawngaihna nei ngah tak te an ni a. Mahni puala in leh lo nei lo tak tak te chu kan tanpui zel ang. Mahse kan khawlai te hi puan in kaih-a intlar put leh mihring khawsakna atana chan tir vek chu kan phal lo ang, thenkhat te phei chu ram dang mite an ni a, lifestyle atan ringawta khawlai a chen chu a rem lo a ni,” tiin Suella Braverman chuan a sawi.
Conservative hruaitu chuan sorkar hian a taka thil a tih vat loh chuan British-a kan khawpui te hi US khawpui thenkhat San Francisco leh Los Angeles te ang maiin policy chak lo lan chhuahna dan bawhchhiatna te, damdawi tihna hmun te leh thil tawp tak tak chenna atana thianghlim loah te kan la siam ve mai palh ang, tiin a sawi a. Mipuiten duhthlan tur an nei a, zana nuam ti lo tak chunga mut nge, sorkar hmalakna tualchhung sorkar ten tha taka lo zawm ve mai, tih hi a ni. Braverman chuan,”Tih tawp ka duh leh dan phuarna hnuaia mipuiin tih tawp an duh chu mipui tualchaina hmuna hnawksak taka lo awm te leh midangte tana harsatna siamtu ten hmun lun leh ualau lai taka an duhna hmun hmuna an puan in an kaih hi a ni,” tiin a sawi a ni.
Suella Braverman thusawi hi opposition party Labour Party hruaitu Angela Rayner chuan lo chhanglet ve lehin ‘Hrehawm tak emaw rem lo taka mut hi mahni duhthlanna anga lifestyle ang mai mai ni lo’ tiin kum 13 kal ta chhunga in leh lo neilo an tam ta lutuk hi Conservative sorkar vang a ni, a ti ve thung a ni. In leh lo nei lote tana tanpuina khawn tih chu Braverman tan chuan thil chhinchhiah tlak tak a ni awm e. “Kawtthlera khawsak hi mahni duhthlanna a lifestyle mai a nilo tih hi kan tihchian a ngai – sorkar policy hlawhchhamzia ti langtu a ni,” tiin Angela Rayner chuan a X-ah a sawi a ni. UK-a sorkar dinglai mekin dan thar a siam tur chu Thawhlehni-a King-in thusawina hun a neihah a tlangpui a rawn pho lang dawn a ni. Braverman chuan September thla kalta khan ram dang atanga rawn pem lut te chungchang ennawn leh siam that a tul thu lo sawi tawhin hemi chungchang hi nakum-a British general election lo awm turah pawh thupui ber a nih a rinawm a ni. Hetih lai erawh chuan human rights lam atang te, opposition lam te leh an mahni members atang te in duhlohna a awm ve zel tho bawk a ni.
UK-ah Puan In kaih khap dawn – Minister
