Ukraine chuan kar hmasa chhunga hmun hla tak thlawk thleng thei drone hmanga Russian tuialhthei thlitfimna leh energy hmunpuite a beih avangin Russia-in harsatna an tawh phah mek.
Ukraine hian kuminah hian ral beih dan chi hnih hmangin Russian eibar tihchhiat leh sipaite an buai theih nan an tuialhthei inpekna tihbuai leh ram danga an thawn chhuah atanga sum an hmuh tihtlemsak nen an bei.
“Hrekna awmze nei ber, thawk rang ber chu Russia-a tuialhthei thlitfimna, an terminal leh tuialhthei chhekna tihchhiat a ni,” tiin Ukrainian President Volodymyr Zelenskyy-a chuan Pathiannia a mipuite hnenah thu a sawiah a sawi.
“Russia hian indonaah hian tuialhthei, boruakalhthei leh energy an neih dang dangte hi a hmang a ni,” a ti.
Pathianniah khan Ukraine hian Russia-a an tuialhthei thlitfimna lian ber pahnihna chu drone-a beiin plant-a processing unit 40% vel an tihchhiatsak.
Russian thuneitute pawhin drone 361 an kah thlak thu leh hengte hi hmun dang bitum an nih ngei thu ans awi.
Reuters news agency chuan hmarthlang lama Kirishi khuaa Kirishinefteorgsintez refinery hi a nih tur ang ni pha lo mah se hmun dangah tam zawk siam chhuah a ni dawn tih a tar lang a. Hmun dang hmang mah se thlitfim hna chu hmun thuma thenkhat hmun thum chauh tih theih a ni dawn tho a ni.
Nikum khan Kirishinefteorgsintez refinery atang hian diesel tonne maktaduai 7.1 leh lawnga hman chi tuialhthei tonne maktaduai 6.1 thlitfim a ni.
Thawhlehni khan Ukrainian sipaite chuan Russian sipaite chawmtu ber pakhat, Saratov refinery an bei leh bawk.
Ukraine-in ral a beih dan hian hna pawh a thawk nghal niin a lang a. Russian sorkar chanchinbu, Izvestiya chuan kar hmasa khan Russian repilic leh region 10-ah tuialhthei indaih lohna a awm niin a tar lang a. Heng zingah hian ram lailia Ryazan, Nizhny Novgorod, Saratov leh Rostov bakah Crimea pawh a tel.
Izvestiya-in petrol station neitu pawl, Russian Independent Fuel Union a biakah station tam takin chawlhkar eng emaw zat tuialhthei an dawn tawh loh avangin an inkhar tan hlawm tih an tar lang.
Region governor-te pawhin tun hnaiah tuialhthei indaih lohna a awm thu an sawi hlawm.
Ukraine hian kuminah Russian tuialhthei thlitffimna lian 10 a bei tawh a, Unmanned Systems Forces commander chuan Russia hian thlitfimna an neih hmun ngaa hmun khat an chân tawh niin a sawi bawk.
“Russian indona hmanrua hi an tuialhthei a zawh chauhvin a tawp dawn,” tiin Zelenskyy-a chuan kar hmasa Zirtawpnia kum tina neih thin, Yalta European Strategy Meeting, Kyiv-a nghahah a sawi.
Tuialhthei lamah che chhe mah se Russian sipaite chuan hma lam pan zelin kar liam ta chhung khan khaw pathum an la a, Ukraine erawh chuan an sipaite an tawlh kir nia sawina chu an pha thung.
Russian sipaite hian Dnipropetrovsk-a Sosnovka leh Novonikolayevka khua leh Zaporizhia-a Olhivske/Olgovskoye an la nia sawi a ni.
Ukrainian commander-in-chief Oleksandr Syrskii chuan region pahniha 17th leh 20th army corps officer incharge chu Thawhtanni khan a bân nghe nghe.
Washington-a think tank, Institute for the Study of War chuan May, June, July leh August khan Russia-in Ukraine ram sw km 1,910-a zau an la a, thi leh hliam 1,30,000 an awm a, sq km bialah 68 zel awm angin a sawi.
Ukraine beihna avangin Russia-in tuialhthei harsat phah mek
