Thla tam tak inpuahchahna leh pilot training neih hnuah Nato member states tena an pek F-16 chuan Ukraine a lut dawn ta a.
Ukraine President Volodymyr Zelensky chuan indo thlawhnate chu Ukrainian tena vansanga Russia chungnunna leh an vansang a thunun tlat laka talchhuah nana pawimawh tiin a sawi.
Chutih laiin Russian forces te chuan Ukrainian F-16s te lakah inpuahchahna an lo kalpui lawksa bawk a. Ukrainian military airfields tam tak te chu tihchhiat tuma bei tawhin F-16 te chuan Ukraine a thlen hnuah tihchhiat a tum nghal dawn tiin a sawi bawk.
July thla chhung hian Russia chuan Ukraine a airfield pathum Myrhorod leh Kryvyi Rih, central Ukraine a awm leh southern Odesa region a airfield pakhat chu a lo bei tawh a ni.
Moscow chuan Ukrainian Su-27 fighter ket panga leh MiG-20 pakhat bakah radar leh Patriot air defence launchers te a tichhia tiin a sawi zui a.
Kyiv thuneitute chuan ngawih chuh thungin engmah an sawi duh lo thung a. Social media lamah erawh Russia-in a tihchhiat tia a inchhal te chu a lem mai mai tia sawiin chung a lem tihchhiat nan chuan Russia-in a Iskander missile man tam tak chu a seng teuh zawk an ti.
Chung thlawhna te chu a lem emaw ni lo emaw Ukraine allies te bakah Ukrainians te ngei pawhin hlauhthawnna nei thungin US siam F-16 te chu humhim an nih loh hlauhna an nei lian hle.
Tun dinhmunah chuan Ukrainian air force te chuan an warplane te chu thuhruk bak tihtheih an nei lo tiin Prof Justin Bronk, senior research fellow for air power and technology, Royal United Service Institute chuan a sawi a.
Thlawhna leh a hmanruate chu base hrang hrangah sawn kual reng thin a ni tia sawiin, “Russia hian airstrike kalpui mahse engmah kah fuh nei lovin a awm thei,” tiin a sawi a.
Mahse Ukraine chuan Western aircraft a dawn hlu tak te Russian missiles laka a humhim tak tak dawn chuan tihtur tam tak a nei thung tih a ni.
F-16s te chuan runway fai tak lungte awm hauh lona leh bawlhhlawh awm lohna an mamawh tih a ni bawk a. Chuvangin Ukraine in a infrastructure te leh base neihsa te siamthat leh thawmthat a tum a nih chuan Russia chuan a hre ngei ngei dawn a ni, tiin Prof Bronk chuan a sawi bawk.
Russia hian Ukraine air base te spy nan surveillance emaw satellite imagery a hmang a, chuvangin a missile ten target an fuh tak tak leh tak tak loh hriatchian theihna a nei lem lo tih a ni bawk a.
Mahse tunah chuan Russia-in spy drone Zala, Supercam leh Orlans te Ukrainian territory chhung atanga real-time image thawn thei a neih tawh avangin Russia dinhmun a tha hle a ngaih a ni.
Drone unit commander Oleksandr Karpyuk chuan drones te chu radio-in a man theih hauh lovin thui tak an thlawk thei tiin a sawi.
Russian defence ministry chuan tun thla tir lama Myrhorod airbase missile hmanga a kap lai tak pawh video a tichhuak a ni.
Tun dinhmunah chuan F-16s ten Ukraine an lut tawh tihchianna engmah a awm lo va. Mahse Kyiv a inbun aviation expert Anatoliy Khrapchynsky chuan Russian forces te chuan Ukrainian airfields te chu an enfiah reng a ti.
Tun thlatir lam khan US Secretary of State Antony Blinken chuan F-16s transfer chu Denmark leh Netherlands atangin kalpui a ni tiin a sawi a. Nato ram te chuan Ukraine hnenah hian F-16s 65 vel an pe dawn a ni.
Tun dinhmuna Ukraine-in fighter jet a neih te chu Soviet hunlaia mi vek MiG-29s leh Su-27s te an ni hlawm a.
Zelensky chuan thla sawm pariat tehmeuh an nghah hnuah indo thlawhnate chuan an ram lut vat vat se an duh thu a lo sawi tawh bawk a. Thlawhna 65 pek tiam leta tam a ngen zawk a ni.
Ukraine-in a F-16s dawn te lei lama an awm laia a venghim thei a nih chuan Russian aircraft te beihletna kawngah awmze thuktak nei dawnin Russian glide bomb te chuan Ukrainian ground forces te an bei thei tawh dawn lo tluka ngaih a ni.
F-16 indo thlawhna mai bakah hian Western ram te chuan surface to air missile systems Patriot leh NASAMS te chu Ukraine hnenah an lo pe tawh bawk.
Ukraine F-16 in buaina thlen
![](https://theaizawlpost.org/wp-content/uploads/tap_logo-min-large.jpg)