Ukraine-in defence minister thlak

Ukraine Defence Minister Oleksii Reznikov chu a hna atanga bantir a nih thu leader Volodymyr Zelensky chuan a sawi.
Reznikov hian February 2022 atanga Russia-in Ukraine a run atangin defence minister hna a chelh char char a.
President Zelesnky chuan defence minstry in ‘kal dan thar’ a mamawh tawh tiin a sawi a.
Ukraine’s State Property Fund enkawl mektu Rustem Umerov chu Zelensky chuan Reznikov thlaktu turah a dah nghal bawk.
“Ministry-in kal dan thar a mamawh tawha military leh society nawlpui anga hisapa kalphung thar a mamawh a ni” tiin Ukrainian president chuan a sawi.
Ukrainian media-te chuan Reznikov chu London-ah ambassador-in dah a ni ang an ti a, London-ah hian senior politician te nena inti tha sa em em an ni.
Kum 57-a upa hi Ukraine indona neiha langsar tak niin khawvel pawhin a hmelhriat tha tak mai a ni a, Ukraine puitu khawthlang ram tena an puih theih nana sulsutu ber anga ngaih a ni.
Defence minister a nihna bansantir tumna hi beisei lawksa tawh niin Reznikov ngei pawhin Ukrainian president nena a dinhmun chelh tur dang an sawi dun thu a lo sawi tawh bawk a.
Local media te chuan Zelensky an project dang khawih tura a tih chuan a zawm mai dawn tiin an lo sawi lawk sa tawh bawk.
Ukrainian defence advisor Yuriya Sak chuan Reznikov chu defence ministry thlak danglamtu tia sawiin Ukraine in NATO member a nih theih nan pawha sulsutu ber tiin a sawi bawk a.
“Amah hriatrengna tur chu khawvel ram hrang hrang defence minister te thil theih loh ang theihin a tihtir thei a ni,” tiin Reznikov chu ralthuam an mamawha foreign sorkar te hnehtu berah a sawi a ni.
Mahse mithiamte chuan Zelensky cabinet thlak danglam chuan Ukraine-in battelfield strategy a neih chu a thlak danglam dawn chuang lovah an ngai a. Gen Valery Zaluzhny- Ukraine armed forces commander chuan campaign a la kalpui zui zel a ni.
Hetih lai hian Zelensky administration-ah anti-corruption drive nasa taka kalpui mek niin hei hi Western institution EU ang te Ukraine-in a zawm dawn chuan tihmakmawh a nih tlat vang a ni.
Transparency International’s Corruption Perceptions Index chuan Ukraine chu ram 180 ah 116 naah a dah a, mahse, tun hnai chhovah Ukraine chuan nasa taka hmasawnna a hmu thung.
Reznikov chu mimal takin eirukna thubuai nei lo leh hming hliauna nei miah lo a ni chungin ministry of defence-ah scandals tam tak a bik takin defence bungrua lei chungchangah a sawm thung.
Kumin kumtir lam pawh khan Reznikov deputy Vyacheslav Shapovalov chu scandal avangin a bang tawh a. Khatih lai khan Reznikov pawh a dinhmun a chhe hle tih a ni bawk.
Hei bakah hian defence ministry chu tun hnaiah a bik takin recruitment office lamah hmingchhiatna nasa tak tawk bawkin Ukraine sipaia tang turte lakah thamna laa puhin an awm bawk.
Kar kalta Zirtawpni khan US National Security Adviser Jake Sullivan chuan senior Ukrainian anti-corruption officials te hmuin anti-graf case a thiam loh chantir te chu khawvel khawi hmunah pawh awm se umzui zel turin a ti bawk a.
Reznoikov hi Umerov, Russia in a run tirha peace talk neiha Ukraine aiawh chuan a thlak thung dawn a ni. MP hlui niin March 2022 khan Russian billionaire Roman Abramovich nena tura hrai hlum tum tia sawi a ni bawk.
Crimean tatar community chhuak niin Zelensky a international outreach kalpuina lama mi pawimawh niin Islamic ramte nena inzawmna tha siamtu ber a ni.
Hetih lai hian Ukraine chuan Wester allies te hnen atangin ralthuam tha tak tak an dawng tawh chungin an hmalakna lamah an kalchak thei lo hle thung a. Mahse, pathianni kha chuan Ukraine chhim lama Russian defence an sut tlang tawh thu an sawi thung.
Hetih lai hian Russia chuan zan lamah Ukraine chuan drone hmangin an territory a beih thin thu sawiin Kursk region-ah pawh Thawhtanni zing lamah drone pahnih an kahthlaksak tiin an sawi.
Hetih lai vek hian Russia chuan chhim Ukraine a Odesa region chu bei ve thungin darkar 3 chuang a bei tia sawi niin Kurchatov a non-residential building pawh tihchhiatin a awm an ti bawk a. Russia drone 17 kahthlak niin sawi a ni bawk.
Izmail region-ah pawh Russian drone chuan tihchhiat a nei teuh bawk a, mahse, nunna chan leh hliam an awm hriat a ni lo thung. Izmail hi Ukraine in Odesa region a thil thawnchhuahna hmunpui bera a neih Danube River a lawngchawlhna pahnih awmna a ni.
Danube ports te chu Ukraine-in July thlaa Black Sea grain deal tlawlh hnua ram danga thawnchhuah nan bera a hman a ni tawh a. Danube hi Moscow chuan beih berah a neih a ni tawh bawk.