Ukraine-in drone-in Russian oil refinery bei fuh

Ukraine-in drone-in Russian oil refinery bei fuh
Ukrainian sipaiten Inrinni zana drone hmanga an beihnaah Russia-a Saratov region-a tuialhthei thlitfimna hmun an kap fuh a, puak leh chhia a awm niin an sawi a. Van sang atanga indona a nasat vanglaiin indona tihtawp turin indawrna a kal mek zel.
Saratov governor chuan Pathianni khan mi pakhat a thi a, residential apartment leh industrial facility a chhe nual tih sawiin oil refinery chhia erawh a sawi lo.
“Ukrainian drone-ten a hma lama an beih ngai loh Russian ram ril zawk an bei a, a hma chuan chhim leh khawthlang hmun thenkhat an bei thin,” tiin Al Jazeera chuan a tar lang a. Ukraine-in tuialhthei thlitfimna a kap fuh nia an insawi hi finfiah a ni lo tih a sawi bawk.
Ukraine-a sipaite hian Sumy region-ah Russian sipaite kut atangin khua an la let niin an insawi a, hlawhtlinna ropui tak niin an sawi.
Ukrainian sipaite hian Russian sipaite lak atangin Bezsalivka khua chu ‘an chhuah zalen a, an thian cek’ tih military general staff-in Telegram-ah a tar lang a. An inbeihnaah Russian sipai 18 ‘an dah tha’ tih a sawi bawk.
Russia-in Ukraine a beih hi kum lina a kai tawh a, European hruaitute chuan US President Donald Trump-a’n indona titawp tura Russian President Vladimir Putin-a nena hmaichhana inbe tura ruahmanna a siam chu tha an tih thu an sawi.
Pathianni khan Ukraine chhim lama Odesa region-ah tui chen khapna hmuna cheng mi pathum chu thil puak vangin an thi a. Black Sea hnaih hi nipui intawllenna hmun ni mah se thuneitute chuan Russia-in a beih hnuah tuipui kamah rah puak bomb a tam avangin tui chen leh kal a phal lo.
Inrinni khan Russia chuan drone hmangin Ukraine-a Kherson region-a bus tifuhin mi pahnih vel an thi a, mi dang 16-in hliam an tuar bawk niin Ukrainian thuneituten an sawi.
Drone dangin bus fuh bawkin beihna hi police-in an chhang let a, officer pathum an hliam niin police-in an sawi.
Inrinni vek khan Russian-te hian Ukraine-a Zaporizhia region an beihnaa Bilenkivska-a car-a chuang mi pahnih an thi a, Vasylivka district-ah hmeichhia kum 61 mi a inah drone hmanga tihhlum a ni bawk.
Ukraineian air force chuan Inrinni zan khan Russian-ten drone an thlawhtir 47 zinga 16 an kap thla tih an sawi a, 31 dangin hmun 15 a fuh tih an sawi.
Russian defence ministry pawhin an ram chung zawn, Black Sea-ah Ukrainian drone 97 a thlawk a, Pathianni tuk khan 21 dang an thlawhtir leh bawk tih a sawi.