Ukraine-in Russia hmun tam taka energy hmunhmate bei

Ukraine chuan drone hmangin Russia-a region bial eng emaw zata energy hmunhmate an bei a, oil pipeline pumping station leh tuialhthei thlitfimna hmun te pawh a tel niin Russian leh Ukrainian thuneitute chuan an sawi.
Ukraine-a General Staff chuan Volga luia Saratov oil refinery an kap a, kangmei nasa tak a chhuak niin an sawi a. Saratov region Governor Roman Busargin-a chuan Telegram-ah beihnaah hian ‘civil mite hmunhma’ tihchhiat a nih thu a sawi bawk a, a kimchang erawh a sawi lo.
Russian defence ministry chuan Inrinni zankhua khan drone 216 hmanga beih an nih thu a sawi.
Kyiv chuan Moscow hmarchhaka Kirov region-a Lazarevo pumping station leh Ukraine atanga km 1,300 vela hla, Surgut-Gorky-Polotsk pipeline chawmtu, Siberia atanga Belarus-a pekna, Lazarevo pumping station pawh an kap tih a sawi.
Kirov region Governor Alexander Sokolov chuan drone-te hian an region-a hmunhma pakhat an kap tih a sawi a, thil chiang leh eng ang chhiatna nge a thlen tih a sawi lo thung.
Ukrainian ramri bula awm, Rostov, Voronezh leh Belgorod region governor-te pawhin chhiatna thlen thu an sawi hlawm a. Belgorod-ah hian civil mi pathumin hliam an tuar a. Ukraine chuan sipaite awmna chauh an kap tih a sawi a, hei bakah hian Rostov region-a tuialhthei kudam an kap bawk.
Russia-te thunun, Crimean peninsula-ah Moscow thlawp Governor Sergei Aksyonov-a chuan thuneitute chuan harsatna nasa zawk awm thei avangin petrol hralhah khuahkhirhna an an siam tih a sawi.
A chhan chiah sawi lo mah se Ukraine hian thla tam tak chhung chu Russia chhimthlang lam, Crimea bula tuialhthei hmunpuite a lo bei tawh a ni.
Ukrainian air force pawhin Russia hian zan khatah drone 229 hmanga beiin an kap chhuak niin an sawi ve bawk a, heng zinga 212 chu Ukraine hmar leh khawchhak lam chungah an kap thla niin an insawi.
February, 2023 atanga Russia-in thapuia a beih hnuah a thenawm, Ukraine nen hian inkahhai puang zeuh mah se an indona a la tawp thei lo va. Tihtawp tumin hmalaknate chuan awmzia a la nei thei lo.
Indonaah hian hun rei tak chhung chu Kyiv hian Russia ram chhung a kap ngai lo va, tun hnaiah erawh an ram laili zawk luhchilhin an eibar hmuhna pui ber, tuialhthei hmunhmate a bitum thar nasa hle a ni.