Ukraine indo hnuah India-in Russian tuialhthei Euro tld 144 man lei

Ukraine indo hnuah India-in Russian tuialhthei Euro tld 144 man lei
Ukraine-a indona a chhuah hnuah Russia atangin India chuan tuialhthei thlitfim loh Euro tluklehdingawn 144 chuang man a la lut tawh niin European think tank pakhatin a sawi a, February, 2022 hnu lamah Kremlin chuan tuialhthei a hralhna atangin Euro tluklehdingawn 10,000 vel a hlep tawh niin an sawi.
Centre for Research on Energy & Clean Air (CREA) chuan India hi China dawta Russian tuialhthei lei hnem ber niin a sawi.
China hian February, 2022-a indona a chhuah hnuah Russia atangin Euro tluklehdingawn 210.3 man tuialhthei a lei a, Euro tluklehdingawn 42.7 man lungalhthei leh Euro tluklehdingawn 40.6 man boruakalhthei a lei bawk a. China-in January 3, 2026 thlenga a dawrna hi Euro tluklehdingawn 293.7 niin an sawi.
India hian Euro tluklehdingawn 162.5 man dawrin heng zinga Euro tluklehdingawn 143.88 hi tuialhthei niin lungalhthei Euro tluklehdingawn 18.18 man a leisak bawk niin CREA hian a sawi a ni.
European Union pawhin tuialhthei Euro tluklehdingawn 218.1 man, lungalhthei Euro tluklehdingawn 106.3 man leh Euro tluklehdingawn 108.2 man boruakalhthei a lei bawk.
“February 24, 2022 atanga January, 2026 thleng khan Russia hian tuialhthei, lungalhthei leh boruakalhthei a hralhna atangin Euro tluklehdingawn 10,000 vel hlep a nei tawh a ni,” tiin CREA chuan a sawi.
Moscow hian Ukraine a rûn avangin G7 ram (US, UK, Canada, Japan, Italy, France leh Germany) leh EU chuan Russia-in thil a hralh chhuah chu an hrek nasa hle a; mahse, hei hi UN Security Council thutlukna ang a ni lo va, ram tam tak – China, India, Iran, United Arab Emirates, Israel leh Saudi Arabia telin, chuan an thlawp lo va. NATO ram, Turkey leh EU-a tel ve hnai, Serbia pawhin hrekna hi an duh lo.
Russian tuialhthei hi EU ramah a lut zui reng a, a tam ber hi Hungary leh Slovakia-ah a ni tih CREA chuan an sawi a. A hrektute ram ngei pawhin thlitfim hnuah an lei chhawn leh tho avangin Russian tan sum an siam reng tho niin an sawi.
EU-in Russian tuialhthei leh lungalhthei a lei zat erawh December, 2022 atang khan a tlem hret hret thung.
India hi khawvela tuialhthei lei tam ber pathumna niin Russian ta hi man tlawmin, khawthlang ramten an lei ai a lei tam hle.
A hmaa Middle Eastern tuialhthei ring thin khan Russia atangin a la lut tam tahle a. Russia-in a thawn chhuah 35% chu India-in a leisak a ni a, a tam ber hi US-in Russia-a thawn chhuak tam pahnih, Rosneft leh Lukoil te November 22, 2025-a a hrek hmaa a leisak an ni.
Hetih lai hian India-in a lei hi a tlem hret hret a, tun thlaah phei chuan a tlem lehzual dawn a, hei hi a leisaktu tam ber, Reliance Industries-in a hawisan tak vang a ni.
US-in a hrek thar hnuah Reliance, Hindustan Petroleum Corporation Ltd (HPCL), HPCL-Mittal Energy Ltd leh Mangalore Refinery & Petrochemicals Ltd chuan Russian tuialhthei an lei hi an titawp a. Indian Oil Corporation (IOC) leh Bharat Petroleum Corporation Ltd (BPCL) erawh chuan an la lei reng thung.