South Korean MP Lee Sung-kwon chuan tun hnai thla rei lote chhunga Russia leh Ukraine indonaa tel North Korea sipaite zingah nunna chan za chuang an awm thu a sawi.
Lee Sung-kwon chuan parliament-ah he thu hi sawichhuakin, National Intelligence Service (NIS) in report an pek danin mi za chuang an thih bakah hian mi 1000 bawr vel chuan Ukraine leh Russia indonaah hian hliam an tuar haw niin a sawi bawk.
Thite zingah hian sipai hotu sang tak takte pawh an tel tih a sawi a, an thih chhan tam zawk phei hi chu North lam sipaite hian ramri chin an hriat loh avang leh drone hmanga beihte an tawh nasat avangin chet lak an thiam lo niin a sawi bawk a ni.
US Pentagon thupuangtu chuan hemi chungchang hi sawichhuak ve bawkin, North sipaite hi tam tak an boral niin a sawi ve bawk a, a zat erawh a tarlang lo thung.
Report thenkhat tarlan dan chuan Ukraine leh Russia indonaah hian Russia lam pui turin October thla khan North Korea chuan a sipai 10,000 a tir tih lo tarlan tawh a ni.
Ukraine indonaah N. Korea sipai za chuang thi
