Ukraine khawthlang lama bomb puakah police thi, tam tak hliam

Ukraine khawthlang lama bomb puakah police thi, tam tak hliam
Ukrainian thuneituten a ram khawthlang lam, Lviv khawpuia mi firfiakte chetna nia an sawiah hmeichhe police officer kum 25 mi thiin mi dang 25-in hliam an tuar bawk tih an sawi.
Inrinni zan lai pelh, Pathianni khaw var hmaa in rawk a awm tih thu bawhzuia thawk chhuak officer-te thlen lai hian tualchher bomb pahnih tihpuah a ni tih National Police of Ukraine chuan an sawi a. Bomb hi bawlhhlawh bawmah dah niin an sawi bawk.
President Volodymyr Zelensky-a chuan ‘mahnia firfiaka che nia hriat pakhat man’ a ni tih a sawi a. Lviv Mayor Andriy Sadovyi pawhin Ukrainian hmeichhia a nih thu a sawi ve bawk.
A hnuah police pawhin kum 33 mi, Russia-a special service agent ‘kaihhruaina hnuaia’ puak thei siama kamtu nia hriat man a nih thu an sawi leh bawk.
Thi hi Viktor Shpylka a ni a. “Kum 23 mi chauh niin Kherson region rûn a nih khan a hna hi a zawm ve chauh a ni,” tiin Pathianni tuk khan police chuan Telegram-ah an tar lang.
Police chuan bomb hmasa zawk hi khawpui lailia dawr rawk a awm tih bawhzuia police car a thlen hnu lawkah a puak niin an sawi a. “A pahnihna hi car dang a thlen leh chiahah a puak leh a ni,” an ti.
Mi 11 damdawi inah dah luh an ni a, an zinga paruk hi dan kengkawhtute niin an dinhmun a tha vak lo hlawm.
Interior Minister Ihor Klymenko chuan an rinhlelh hi police leh Security Service of Ukraine ten an man a, hmarthlanga Rivne region-a cheng niin a sawi a. “Mi dang inhnamhnawihte pawh kan hre tawh,” a ti.
Hetih lai hian regional prosecutor pisa chuan ‘buaina thlentu firfiaka chetna’ hi a chhui hna an thawk tan mek tih a sawi thung.
Thawhlehnia Russia-in a rûn champha kum lina a thlen mai dawn laiin Inrinni zan khan Ukraine hian zankhuain van sang atanga beihna a tawng leh bawk.
Kyiv chuan an air defence system hmangin Russian missile 50 leh drone 300 dawn an kap thla niin an sawi a. Energy hmun, mihring chenna leh relkawngte beih a ni tih Zelensky-a chuan a sawi.
Inrinni zan zankhuaa beihna an tawhah hian Kyiv region-ah mi pakhat a thi a, hmeichhia leh naupang pakhatin hliam an tuar bawk tih region thuneituin a sawi.