Thawhtanni zan leh Thawhlehni tuka Russian thlawhnaten Ukraine an beihnaa lung in leh damdawi in an kah fuhah mi 25 vel an thi tih tual chhung thuneituten an sawi.
Thi an tamna ber chu Zaporizhzhia region chhim lama Bilenke penitentiary a nih thu leh mi tang 16 an thi a, mi dang 50 chuangin hliam an tuar.
Hmarchhaka Kharkiv region-a puihna dawn tuma intlar kah fuhnaah mi panga an thi bawk a. Dnipropetrovsk region-ah nau pai lai pathum an thi bawk a. An ram chhung hmun dangah pawh thi leh hliam an awm.
Ukrainian President Volodymyr Zelensky chuan Russia chuan hrekna ‘na tak’ hmangin ‘mi thah tawpsanin muanna an siam ngei tur a ni’ tih a sawi.
Thawhlehni tuka Ukraine-a justice ministry-in thuchhuah a siamah glide bomb paliin Bilenke penitentiary hi zanlai pelh hretah a fuh a, dining hall, administrative headquarters leh quarantine area a tichhia niin an tar lang.
Mi 50 chuang hliam tuar awmin an zinga 44 chu damdawi ina lak an ni.
Ministry chuan a hmain mi tang thi hi 17 an ti hmasa a, a hnuah an siam tha leh.
Ukraine-a human rights commissioner chuan lung in beih a ni chu humanitarian law bawhchhiatna chiang tak niin mi mante hian nun theihna leh himna tura dikna chanvo an neih loh phah chuang lo tih a sawi.
Russian sipaite hian kum 2022-a Ukraine an rûn atangin Zaporizhzhia region an bei nasa hle a. Kum 2022 atanga indona a chhuah tirha Ukraine chhimchhak lama region pali an luah zinga mi a ni.
Thawhlehni tuk khan Russian rocket-in Kharkiv region-a Novoplatonivka khuaa mi panga a tihlum bawk niin tual chhung thuneitute chuan an sawi.
Khaw mite hi dawr pakhata puihna thil la tura an intlar laiin beih an ni tih regional police chief Petro Tokar chuan Ukraine-a Suspilne TV channel a hrilh.
Ukraine-a thuneitute a hnua thlalak an tihchhuahah ruang let reng leh a bula dawr chhe vek a lang.
Russian rocket dangin Kamianske, Dnipropetrovsk region-a damdawi in fuhin mi pathum an thi bawk.
President Zelensky-a chuan thuchhuah a siamah Russia-in Ukrainian-te a thah zel chuan ‘inkahhai chu a la hla dawn’ niin a sawi.
US President Donald Trump-a chuan Thawhtanni khan Moscow hnenah ni 10 atanga 12 inkarah Russia chu inkahhai inremna siam turin a ti a, a nih loh chuan hrek a tum tih a sawi.
Zelensky-a chuan Trump-a thu ‘a pawimawh hle’ tih sawiin Russia chuan ‘hun a khawhral nasa’ a ti.
Russia chuan a sipaiten Ukrainian ram an lut thuk zel tih a sawi a. Kartawpah khan Maliivka an lak thu puangin a hmain Dnipropetrovsk region-ah khua an la tih an sawi bawk a. Ukraine chuan hei hi a hnawl thung.
Hetih lai hian Russia-a thuneitute chuan Ukraine-in zankhuain chhim lama Rostov region-ah drone thlawh luhtirin Salsk khuaa car-a chuang pakhat thiin bungraw phur rel a kang bawk tih a sawi.
Ramri hrula Belgorod region-ah car-ah tho mipa pakhat thiin a nupuiin hliam a tuar bawk tih an sawi.
Ukraine lung in leh damdawi in beihnaah mi 25 thi
