Ukraine power plant chhia, khaw vawtah intilumna awm lo

Ukraine power plant chhia, khaw vawtah intilumna awm lo
Russia-in zan lama drone hmanga Ukraine chhim lam a beihnaah Mykolaiv-a thermal power plant a tichhia a. He plant chhawrtu mi 46,000 chu tui a khang theihna khawp khaw vawt hnuaiah intihlumna nei lovin an awm phah mek tih Ukrainian Prime Minister Denys Shmyhal-a’n a sawi.
“He thil hi khaw vawt uchuak tak kara miin intihlumna an neih lohna tura rawng taka chetna leh mihring inpalzutna dik tak a ni,” Shmyhal chuan Pathianni khan Telegram messenger app-ah a tar lang.
Ukrainian President Volodymyr Zelenskyy chuan Inrinni zankhuaa beihna an tawh hi a thawk na hle tih a sawi a, mi 1,00,000 velin intihlumna tur an neih loh phah tih a sawi.
“Ukrainian khawpui pangngai ve mai leh a chengte pawh civil mi mai an ni a. Anni hian rel donaah hian engmah tih an nei ve lo,” tiin civil mite beihna ngei a nih thu X-ah a tar lang.
“He thil hi Russian-ten kan mipuite laka indo a kalpui dan leh Ukraine a beih dan chu a ni,” a ti bawk.
Mykolaiv-ah hian siam that hna thawktuten ‘ngawrh takin’ siam that tumin hna an thawk nghal char char tih a tar lang bawk.
Russia hian Inrinni zanah khan Ukraine hi drone 143 hmangin a bei a, Ukrainian sipaite chuan 95 chu an lo kap thla a, 46-in an tum an thleng zo lo bawk niin an sawi a. Electromagnetic countermeasure an hman chuan drone-a beihna lakah hian a veng hle tih an sawi.
Beihnaah hian mi pakhatin hliam a tuar a, Kyiv region-ah chenna in a chhe nual bawk niin Ukrainian thuneitute chuan an sawi a. Mykolaiv-ah hian khaw vawh lam hi Pathianni zan khan -7°C a ni dawn niin an sawi lawk.
Ukrainian sipaite chuan Pathianni khan a hma darkar 24 liam ta chhungin ‘Russian sipaiten chet an la thar zual’ tih an sawi a. “A tlangpuiin Russian sipaite hian thla eng emaw zat chu ram zauh an nei mang tawh lo va; mahse, hei hian indona hi a nasa tawh dawn lo tih erawh a entir chuang lo,” tiin Al Jazeera-a thawk, Kyiv-a awm chuan a sawi.