Ukraine tantuten Vermont-ah Vance-a lo hmachhawn
White House-a President Donald Trump-a nena tangduna Volodymyr Zelensky an inhauhpui hnuah US Vice-President JD Vance chu Vermont a tlawhnaah mipuiin a laka lungawi lohna an lantir.
Mipuite hi Ukraine tantute niin Waitsfield-a Vance-a leh a chhungten vur an tlengna hmun tur an pan tur chu lo hmuakin lungawi lohna an lo lantir a ni.
US chanchinbute chuan hetianga hmuah an nih avangin an vur tlengna tura ruahman chu thlakin hmun dangah an kal ta zawk niin an tar lang.
Oval Office-a inhnialna a thlen tuk, Inrinni pawh khan New York, Los Angeles leh Boston-ah chuan Ukraine thlawpna tilangin mipui an pungkhawm bawk.
Oval Office-a an inhnialnaah khan Vance-a hian Ukrainian president hi US zah lovah a puh a. Trump-a pawhin Zelensky-a hi na taka chhangin Russia nena inrem a duh lo a nih chuan an kalsan tur thu a hrilh a, Indopui III-na chhuahna tura cheah a puh bawk.
Waitsfield-ah hian kar liam taah pawh khan Trump-Vance sorkar laka lungawi lohna hi lantir a lo ni tawh a. Hei hi Zelensky-a nena an inhauh hma kha niin an hmalak danah Ukraine tan lovah an ngai a ni.
“Zirtawpnia White House-a thil thleng khan vawiina mite hi a ko chhuak a ni,” tiin lungawi lohna huaihawttu, Indivisible Mad River Valley-a mi, Judy Daly chuan Vermont Public Radio hnenah a sawi.
“Vance-a khan a tih tur bak a ti a ni,” tiin an zinga pakhat, Cori Giroux chuan a sawi bawk.
Vance chhungkuain an tlawh hma hian Vermont Governor Phil Scott-a chuan an chungah ‘zahna’ lantir turin mipui chu a lo ngen tawh.
Republican ni chunga Trump-a vote duh lo, Scott-a chuan Vermonter-ten vice-president leh a faten an hmun an tlawh a ni tih an hriat reng a beisei thu leh zahna lo lantir turin a ngen a ni.
Vance-a hi a nupui, Usha-i leh a fate pathum nen an ni a, vantlang hriatah lungawi lohna lantir hi a la sawi lo va. Waitsfield-ah vek hian Trump leh Vance thlawptuten lungawi lohna lantir rual hian lo lawmna an huaihawt ve bawk.
Ukraine tantuten Vermont-ah Vance-a lo hmachhawn
