Ukraine tlawm chuan Indopui III-na

Ukraine prime minister chuan indona kal mekah Russia-in Ukraine a hneh a nih chuan ‘Indopui pathumna a chhuak ang’ tia sawiin US Congress chu foreign aid bill tang te tifel vat turin a ngen.
Denys Shymhal chuan US lawmaker te chuan Kyiv tanpuina tur atana $ 61 billion dahhran tawh chu remtihna an pek ngei an beisei tiina sawi bawk a.
Kyiv hnena tanpuina pek tur aid package chungchang hi Inrinni hian House of Representatives-ah vote hmanga tihfel a ni dawn a ni.
Ruahmanna siamah Kyiv mai ni lo Israel leh Indo-Pacfic ram te tanpuina tur pawh a tel bawk a ni.
Prime Minister Shymhal chuan US security assistance chu “He sum hi nimin khan, naktuk ni lo, vawiin pawh ni lovah kan mamawh tawh zawk,” tiin a sawi a.
“Kan humhim lo a nih chuan Ukraine chu a tlawm mai dawn” tia sawiin, “Tichuan khawvel pum security chu tihchhiatin a awm ang a, khawvelin security system thar a siam a ngai ang” tiin a sawi bawk a.
“Chutiang a nih loh chuan buaina tam tak chhuakin chung indona hrang hrangte chuan a tawpah chuan Indopui Pathumna a thlen mai dawn a ni,” tiin a sawi bawk.
Tun hi Ukraine-in Russia nena indona an neih mekah an chak lo thei tia a sawi tum khatna a ni lo. Nikum khan President Volodymyr Zelensky pawhin Russia-in chakna a chang a nih chuan Poland a run leh zui ang a, Indopui Pathumna a chhuak ang a lo ti tawh bawk.
Kremlin officials te chuan chungte chu hnawl thungin Khawthlang ram ho phuahchawp an tihsak thung a. Thla kalta pawh khan Russia president Vladimir Putin chuan Russia in Eastern Europe a la run ang tia sawi chu awmze nei lo tiin a lo sawi tawh bawk.
Russia hian Nato ram pakhatmah beih a la nei ngai lo va, Poland pawh Nato ram zinga mi a ni. Nato chu collective defence pact niin member pakhatin beih a tawk a nih chuan tangruala chhan tur a ni thung.
US Congress ah opposition Republican party te chuan thla eng emaw chhung chu Ukraine tanpuina pek an dang tlat tawh a. Lawmaker thenkhatte chuan US-Mexico border security chu hmathehah dahin chumi chinfel hma chuan ram pawn hmun dangah dollar billion tel tanpuina pek an remti lo a ni.
Hetih lai hian President Joe Biden chuan Congress in tanpuina ruahmante chu a pawmfel veleh hming a ziah hnan nghal tur thu sawiin kan thiante tan kan din a ngai a ni tiin a sawi bawk.
Ukraine chu khawthlang ram a bik leh US tanpuina leh puihnaa innghat bur a ni a, Russia nen an indonaah sipai leh artillery ammunition lamah an inkhan lo lutuk a ni.
US Congress in tanpuina pek a remtih mai loh avang hian Ukraine chu indona tualzawlah a hnugtawlh zel bawk a. Ralthuam a nei chau tial tiala, a sipaite phurna a tlahniam zel bawk a, ram a hloh char char bawk.
February thla khan buaina chhuah tirh kum 2014 atanga Donetsk a khaw pawimawh tak Avdiivka atang pawhin Russia sipai ten an nawr chhuak tawh bawk a.
Ukraine sipai hotu Oleksandr Tarnavskyi chuan artillery ammunition Russia in 10 a neih laiin pakhat chauh kan nei a, inhnuhdawh loh ngaihna a awm lo tiin a sawi.
President Zelensky pawhin ralthuam an tlakchhamna chu sawi fovin khawthlang ram te hnenah tanpuina pe turin a ngen chamchi bawk.
President Biden pawhin Ukraine tlawh hnun zel nachhan ber chu ralthuam supply a hmuh loh vang tia sawiin Congress in hmalakna a neih duh loh vang a ni a ti.
Avdiivka hloh kha May 2023 a Bakhmut atanga Ukraine umchhuah a nih hnua a hloh lian ber a ni bawk.
UK Joint Forces Command commander hlui General Sir Richard Barrons chuan weapons leh ammunitin a mamawh te pek a nih loh chuan kumin chhungin Ukraine chu a tlawm hman ang tiin a sawi.
“Frontline ah Russia-in hma a sawn zel a, artillery, ammunition leh sipai ngah lamah pawh Ukraine-in pakhat a neih laiin Russia chu panga zel nei ang a ni” a ti a.
“Ukraine hian chak zo dawna inhriat loh hun a nei thei. Chutiang dinhmun a thleng a nih chuan tuin nge thi tur ringawta raldo duh ang,” tiin a sawi bawk.
President Zelensky chuan indonaah Ukrainian sipai 31,000 in nunna an chan tawh tiin a sawi a. Mahse US officials te chuan mi 70,000 chuangin nunna an chan tawh ang an ti thung a. Tun hnai lawkah BBC investigation chuan indonaah Russia sipai 50,000 chuangin nunna an chan tawh a, mi dang tam tak hliam tuarin an awm a ti bawk.
Ukraine leh Russia te hian official-in an sipai nunna chan leh hliam tuar zat tun hnaiah an tarlang duh lo hrim hrim a. A hmaa an tarlan te pawh awihsak an ni chuang lo.