Ukrainian sipaiten Sumy-a Russian kal zel tur dang

Ukrainian sipaiten Sumy-a Russian kal zel tur dang
Ukraine-a sipai hotu, Gen Oleksandr Syrskyi-a chuan an ram hmarchhak ramri, Sumy region-a Russian kal zel tur an dangchat tih a sawi.
Ningani khan ramri hi a tlawh a, Syrskyi-a hian ramri hrula an ding nghet tih sawiin Russian-ten nipuia beihpui an thlekna chu ‘an titawp’ tih a sawi.
Hetih lai hian Syrskyi-a hian ramri a tlawhnaah hian hmun tam takah an tanhmunte chu an tihchak thar vat vat an mamawh tih a sawi.
Syrskyi-a’n a tlawh hma hian Russia-in he region-a hma an sawnna chu tun hnaiah Ukrainian sipaiten an nawr let tih sawi a lo awm tawh bawk.
Hetih lai hian Ukrainian sipaite dinhmun chu a la nghet tawk lo niin Border Guard thupuangtu, Andriy Demchenko-a chuan kar tirah khan a sawi.
Sumy hi nikuma Ukrainian sipaiten an nawr thut tuma hmun tam tak an lak, Russia-a Kursk region nen an inri a. Ukrainian-te hian thla rei lo te chhungin um chhuah an tawk leh thung.
Kursk hmun tam tak an hloh hi Russia tan chuan chânna lian tak tlingin April khan President Vladimir Putin-a chuan ramri hrul chu ‘security buffer zone’-ah siamin Ukraine- Kharkiv, Sumy leh Chernihiv region-te nena an inrinaah sipai a dah belh.
Hemi hnu atang hian Moscow chuan Sumy huam chhungin a bei tan a. May thla chawhnu lamah khan Ukrainian President Volodymyr Zelensky-a chuan ramri-ah hian Russian sipai ‘chak leh tam tak’ tia sawiin 50,000 an awm thu leh ramri km 10 chu buffer zone-ah an siam thu a sawi.
Sumy region-a sipai a chhawp tam lo chu Zelensky-a hian sawisel a hlawh phah tawh thin a, Ningania Syrskyi-a’n a tlawh leh an dinhmun a sawi hian mipui ngaihan tam tak a hruai thei tura ngaih a ni.
Russian-ten Ukraine an beih tan tirhah pawh khan Ukraine hmun thenkhatah lo dang thei an indah that tawk loh avangin Moscow pawhin chak takin hma a sawn phah.
Sumy him theihna tura inkulh that theihna remchang, kum 2024 favang lai pawh khan Ukrainian sipaite hian Russia-a ramri hrila Kursk region-ah an che nasa a, Sumy hi an la ngaihthah cheu a ni.
Tunah hian Russia chu an lut thuk viau tawh a, Ukraine hian an kal zel lohna turin hma thar an la ve ta a ni.
Thla eng emaw zat liam ta atang khan Moscow hian Sumy-a khua leh khawpui tam tak chu missile hmanga beiin mi eng emaw zat an lo thi tawh a ni.
Russia-in thapuia Ukraine a rûn hi February, 2022 kha niin kum lina a ni tawh a. Tun hnaiah Russia hian drone hmangin Ukrainian khawpute an bei nasa hle.
Tun hnaiah Ukraine leh Russia inbiain mi tang an inthleng a, inkahhai erawh an la sawi chhuak thei lo.