Kumin April 20 atanga May 1 inkar khan New York-ah United Nation Permanent Forum on Indigenous Issue (UNPFII) thutkhawm vawi 25-na neih a ni a. Zo Reunification Organization (ZORO) leh Zo Indigenous Forum (ZIF) aiawhin ZoRO general secretary Lalnunfela Chawngthu a tel.
Intawhkhawmah hian thupui thlan bik – “Ensuring Indigenous peoples’ health, including in the conflict” tih hman a ni a. He thupui chhungah hian agenda hrang hranga thendarhin, hriselna leh indona in a nghawng, sum leh pai, mihring dikna chanvo leh UN 6 Mandated area sawiho a ni.
ZORO leh ZIF aiawhin Lalnunfela Chawngthu hian, Zofate chu kan duh leh remtihna reng vang ni loa thendarh kan ni a, kan inunauna kawngah leh hnam zia chhawmnun kawngah nasa takin harsatna a thlen phah tih a sawi. Zofaten Chin Hills (Myanmar), Chittagong Hills Tract (Bangladesh) leh Manipur (India) ah tihduhdahna an tawrh thu, pi leh pu atanga an ram ngeiah thlamuang taka an awm ngam tawh loh thu a thlen bawk.
India sawrkarin Indo-Myanmar ramri hung a tum chu Zofate dikna chanvo bawhchhiatna leh UN Declaration on the Rights of Indigenous Peoples bawhchhiatna a ni tih a thlen a. Ramri hung hian hnam anga inunauna kawngah harsatna nasa tak a la siam dawn tih a sawi.
“Keini Zofate hi diklo taka rorel sak mek kan ni a, kan dikna leh zahawmna humhima a awm theihnan leh kan dikna chanvo kan chan theihnan ‘Indian Independent Act 1947 section 7.1(c) leh Panglong Agreement 1947’ mila kan chanchin min zirchian sak a, kan chan tur dik tak min chhawp chhuah sak turin UNPFII hruaitu leh rapporteur-te ka sawm a ni,” a ti.
UN intawhkhawmah ZORO aiawh
