Foreign Contribution (Regulation) Amendment (FCRA) Bill 2026 endik hmasa tura Joint Parliamentary Committee kuta dah a nih tak chungchangah Mizoram sawrkar leh kohhran hruaitute hmalakna leh, hemi atana Union Home minister inpekna lawmawm an tih thu ZPM party chuan an sawi.
ZPM Gen. Hqrs. thuchhuak chuan, August 12-a Lok Sabha Parliament Monsoon Session-ah Union Home minister Amit Shah supplementary list of business motion-ah FCRA Bill 2026 chu member 31 awmna Joint Parliamentary Committee (JPC) endik hmasak tura thehluh a ni a. JPC kuta FCRA Bill 2026 a awm ngei theihnana hmalatu Mizoram sawrkar leh kohhran hruaitute chungah an lawm hle tih a sawi
Chief minister Pu Lalduhoma leh kohhran hruaitu pawl pahnih – Council of Churches in Mizoram (CCM) leh Mizoram Kohhran Hruaitute Committee (MKHC) in FCRA Bill 2026 chu JCP kuta a awm ngei theihnan theihtawp an chhuah a. August 9 tlai dar 5.00 khan social media ‘X’ kaltlangin Mizoram sawrkarin ngenna thu a thawn leh a, a hlawhtlinna hmel hmuh a ni ta chu a ropui an tih thu a sawi bawk.
‘FCRA Bill 2026 hi sawrkar laipui kuta a awm lai ngeiin, Mizoram sawrkarin a nihna anga pawm mai a nih lohnan a zirchiangtu tur JPC kuta dah a nih theihna turin theihtawp chhuah chhunzawm a ni a. Tunah he hlawhtlinna ropui tak hi a thleng ta phawt a ni. Mizoram sawrkar, mipui leh kohhran thawhhona rah tha tak a thleng ta hi thil chhinchhiah tlak a ni a, hemi atana Union Home minister inpekna hi thil lawmawm tak a ni a, a chungah lawmthu kan sawi a ni,’ a ti.
FCRA Bill 2026 chik taka endik hmasa tura Joint Parliamentary Committee kuta dahah hian member 31 an awm dawn tih sawiin, speaker ruat Lok Sabha member 21 leh chairman ruat Rajya Sabha member 10 awmna a ni dawn tih a sawi a ni.
‘FCRA Bill 2026 avang hian Mizoram chief minister, CCM leh MKHC aiawhten New Delhi-ah August 6 khan Union Home minister an hmu a. Memorandum thehlutin, Amit Shah hian Parliament Session lamah ngaihven zui tur a nih thu a lo hrilh tawh. Heti taka Mizoram sawrkar, kohhran leh mipuiin FCRA Bill 2026 a nihna anga pawm a nih mai lohna tura hma lak a nih lai hian, sawrkar laipuia sawrkar zawm ber MNF erawhin thawm an nei lo. Mizoram atanga sawrkar laipuia BJP kaihhruai National Democratic Alliance zawmpui ber party-in hmalakna langtham an nei lo hi an demawm hle,’ thuchhuah hian a ti.
Union Home minister chungah ZPM lawm
