Tun hnaia Mizoram NGO hrang hrang aiawhte leh Union Home Secretary Govind Mohan inkawmnaah khan Mizoram tana thil pawimawh tak tak, ramri hung, Lengpui Airport, Free Movement Regime leh thildangte sawiho a ni a.
Union Home Secretary hian Mizorama ruihhlo hluar a vei thu leh, Mizo mipuiin nasa taka an do chu lawmawm a tih thu sawiin, hemi kawnga hmalatute chu Narcotics Control Bureau kaltlangin sum leh hmanrua a tul apiangah an pui dawn tih a lo sawi a. Hei hi thil lawmawm tak a ni.
Sawrkar, pawl hrang hrang, kohhran leh mimal thahnemngaiten ruihhlo hi kan do luih luih a, sum leh pai, hun, tha leh zung lah kan seng nasa. Heti chung hian, a zualzapui vailenhlo tih zawng zawng kan chang zo a, kan do nasat poh leh a pung tual tual ni maiin a lang tawh a. Ramri atanga ruihhlo lo lut, kawnglaka thang mek leh, khawi lai emaw lo chheprelh man chhuahte hi, ruihhlo kan man chhuah dan a ni tlangpui a.
Ram chhunga ruihhlo lo manchhuah hi a tlai mah mah tawh. Ram chhunga lo lut tur, ramri kana ruihhlo tawlh thinte hian ualau takin Gate pui ber paltlangin an rawn pu lut ngawk ngawkin a rinawm loh. A tam zawk hi chu a rukin thimtham hnuaiah, ramri lui kanin, ramhnuai leh hmun biru lai chuhin ruihhlo kengtute hi an lo luh a rinawm. Chutiang lo rek chhuak tur chuan drug prevention squad emaw, a enga pawh chu lo ni se, ramri dungah hian patrolling hi kan kalpui ngawrh a pawimawh hle a. Chutianga patrolling nei tur chuan senso pawh a hautak hlein a rinawm.
Tuna Home secretary-in ruihhlo dona atana Narcotics Control Bureau kaltlanga tanpuina a awm theih thu a sawi hi, tuna kan sawi tak kalpuina atan te pawh, bawhzui zung zung a pawimawh dawn hle.
Hetih lai hian, ramri Khanpui ber Gate kaltlanga bungrua lo lutte pawh hi uluk taka lo endik zel a nih loh phei chuan, hemi chungchangah pawh hian kalphung thar ruahman a tha khawpin a rinawm.
Home secretary thusawi hi chak taka bawhzui chi a nih hmel e.
Union Home Secretary leh Mizoram ruihhlo
