Ni hnih chama Siaha tlawhtu Union minister of state for Health & Family Welfare Prof. SP Singh Baghel chuan Nilaini tlai khan Maraland Gospel Centenary Hospital a tlawh.
Charity hospital an nih angin mipui tana an rawngbawlna chu ropui a tih thu a sawi a. Maraland Gospel Centenary Hospital-in sawrkar laipui atanga tanpuina tam zawk a hmuh theihna atan theihtawp chhuahpui a intiam a. Mipui tam zawk thleng phak rawngbawlna an neih theihnan PM-JAY hmang theia hma lo la turin a chah.
Siaha NGO – Mara Thyutlia Py (MTP) leh Mara Students’ Organization (MSO) hruaitute a kawm a. MTP hruaitute hian kumina ‘Platinum Jubilee’ an lawmna tur leh Youth Festival hmanna tura an mamawh bakah Chhimtuipuia tui tla an awm changa mawhphurtu ber pakhat an nih avangin ‘life saving board’ an mamawh thu an thlen a. MSO hian conference an hmanna tur leh mamawh dang an thlen a ni. Prof. SP Singh Baghel hian an thu thlen hi Delhi a thlen hunah a bawhzui tur thu a hrilh.
Ningani khan Govt Saiha College a tlawh a. Prof. SP Singh Baghel chuan India ramin zalenna a hmuh atang khan ‘common education’ mumal taka kalpui a nih loh avaning harsatna tam tak zirlaiten an tawk tih sawiin, “Common education mumal lo tak avangin zirna kawngah mi hausa leh retheite kar a hlat phah hle a. Zirna lama milian leh te ber kara intluktlanna thlen turin common education system chak tak kapui a tul a, kalpui mek zel a ni,” a ti.
Sawrkar school-ten private school an pha ta lo lutuk chu veiawm a tih thu a sawi a. Sawrkar zirtirtuten nasa zawka tan an lak a tul tih a sawi.
Union MoS-in damdawi in tlawh
