Union MoS leh state minister inkawm
Zan riaka Mizoram tlawhtu Union minister of state for Agriculture & Farmers’ Welfare Ram Nath Thakur chu Agriculture & Farmers’ Welfare minister PC Vanlalruata’n a pualin Thawhtanni khan zanriah a buatsaih sak a, an inkawm bawk.
Union MoS chuan Mizorama hmun thenkhat a tlawhnaa kuthnathawktute tih hmasawnna tura a thil ngaihpawimawh sawiin, Agriculture & Farmers’ Welfare department hnuaia sawrkar laipui scheme hrang hrang chak zawka kalpui a pawimawh tih a sawi.
Siaha district-a kuthnathawktute a tlawhnaah mi taima leh thawkrim tak tak a hmuh rualin, hmasawnna nasa zawk an chan theihnan an harsatna sukiang turin sawrkarin mawhphurhna pawimawh tak a nei tih a sawi a. Sawrkar laipui kaltlanga Agriculture department hnuaia kuthnathawktute tana tanpuina awm ang ang chu a dawngtu turten a hun taka an dawn theihnan thawktute chu tan la lehzual turin a chah.
Minister PC Vanlalruata chuan kuthnathawktute dinhmun chawikanna atan sawrkai laipui atanga ruahmanna tha tak tak siam a ni thin chu lawmawm a tih thu a sawi a. Union MoS hnenah hian Tung leh Cocoa cultivation kalpuina turin sawrkar laipuiah ruahmanna thehluh a ni tawh, tiin, he ruahmanna hi kalpui thuai a nih theihnan theihtawp chhuahpui turin a sawm tih a sawi a ni.
Union MoS leh state minister inkawm
