India ‘Union of States’ a nihna chu Narendra Modi sawrkar hnuaiah a derthawng mek zel tih Congress party chuan an sawi.
MPCC thuchhuak chuan, Rashtrapati Bhawan-in September 9-a G20 Dinner neih tura sawmna a siamah ‘President of India’ tih aiah ‘President of Bharat’ a tih chu, ram danpui Article 1-a “Bharat, India chu Union of States” a ni ang, a tiha ‘Union of States’ chu derthawngah a siam tih a sawi. ‘India tih aia official-a Bharat a hmang lui hi India rama Hindu lentir tumna kalzel a ni a. President of Bharat tia sawmna semchhuah a nih hma lawk ni hnihah Hindu kulmuk Rashtriya Swayamsevak Sangh (RSS) chuan India tih hmang tawh loin, Bharat tih hman tawh tur an ti a ni,’ a ti.
‘India’ hi BJP-in a hnawl ngawt theih a ni loa, India mipui vaibelchhe 135 chu political party pakhat ta a ni loa, national identity chu BJP personal property a ni lo tih MPCC hian sawiin, centre-a BJP kaihhruai NDA chu a bikin Northeast State-te tana hlauhawm zual an nih thu leh, sum leh pai leh thuneihna hmangsualin thuneihna an chan theih nan mipui thlan sawrkar pawh zah zo loa, a remchan dan ang anga paihthlak tum reng an nih thu a sawi.
‘BJP hian mipui thlan sawrkar chu namnula paihthlak an ching a. Hei vang hian kum 2014 hnu ah Parliamentary leh Assembly Constitutency-ah by election 436 a awm phah tawh. BJP thuneihna atchilhna hian kan politics tikhaw loin, Anti-Defection Law pawh hmantlak lohin a chhuah tawh a ni,’ a ti.
BJP sawrkar chuan history her danglam a, India thendarh an tumna leh Hindu rama siam an tumna chu chak takin an kalpui reng tih pawh sawiin, ‘One Nation, One Election’ min barhluih an tum mek bakah ‘One Nation, One Law’ (Uniform Civil Code) phur takin an buaipui mek tih MPCC hian a sawi. Tun ang renga thil a kal chuan ‘One Nation, One Religion’ pawh an la ti duh mai a rinawm tih sawiin, New Education Policy hmanga ‘three language formula’ kalpui an tum angin, ‘One Nation, One Language’ pawh an thiltum bul ber pakhat a ni tih a sawi a ni.
‘Kan ram, kan hnam, kan sakhua him theih nan leh India ram khawi hmunah pawh sakhaw zalenna a awm theih nan Congress party lo chu Zofaten duhthlan tur kan nei lo,’ thuchhuah chuan a ti.
‘Union of States’ dinhmun a derthawng mek – MPCC
