February 19, Pathianni zan khan English Premier League khelh chhunzawm a ni a. Manchester United chuan Old Trafford-ah an mikhual Leicester City chu si thum faiin an hneh a, pathumnaah an insawh nghet. Inkhel dangah Tottenham Hot-spurs chuan si hnih faiin West Ham United an hneh a, palinaah an inhlangkai ve bawk.
Dal theih loh Rashford Old Trafford-a an mikhual Leicester City lakah Manchester United in an khel tha a. Erik ten Hag hnuaia khel tha tak Marcus Rashford chu dan theih lohin a inlan chhunzawm zel a, Rashford hian an mikhual lakah goal hnih a thun. An goal khat dang hi Jason Sancho thun a ni ve thung. Foxes lakah hian United si nghak David de Gea a langsar viau bawk a. Si nghak tha mi De Gea hian United tan clean sheet vawi 180 a nei tling chiah a, United tan clean sheet ngah ber Peter Schmeichel record a nih rual a, club record thar siam thuai tura ngaih a ni.
Pathumna luah nghet a, an chunga mi Arsenal leh Manchester City hnaih lehzual turin United hian an mualah chak an mamawh a, point thum hmuh ngei tumin tan an khawh. An muala inkhel mah ni se bul tan chhe zawkah an tang a, goal an chhuah hmasa teuh hle. Leicester City hian fuh zetin mualneitu United an nawr tlang a, Barnes shot tha zet chu si nghak Devid de Gea chuan a lo dang hman hlauh a. Hemi hnu lawk hian Iheanacho tauh tha zet pawh De Gea hian mak takin a lo dang leh hman hlauh bawk a, an team a chhan him nawn leh.
Derthawng zawk leh bet zawnga an tan hnuin United an insiamtha thuai a, goal thun hmasa zawkah an tang. Bruno Fernandes ball pek tha tak chu tunlaia chetha em em Marcus Rashford chuan a umfal a, tibuaitu awm lovin minute 25-naah hmahruaina goal a thun. United hian chawlhlawk hmain goal thun belh theihna hun tha an nei a, Fernandes ball pek tha tak chu Diogo Dalot chuan ho zetin a hlah a, goal a thun belh thei lo.
Chawlhlawk hnu lamah United an khel tha chhunzawm zel a, goal hnih an thun belh zui ta hial bawk. Minute 56-naah thui tak ball a khalh hnuin Marcus Rashford chuan United goal hnihna a thun. United leh England forward Rashford hi World Cup hnu lamah a che tha viau a, goal thun a thulh hleithei meuh lo. Season kal mekah United tan goal 24 a thun tling hial tawh a, United champion pui thei khawpin a che ropui chho hle.
Si hnih faia hma an hruai hnuin United an khel tha lehzual a, goal an thun belh leh thuai. Mawi taka ball inpekualin, an mikhual tlarhnung chiang takin an thiat a. Minute 61-naah Jadon Sancho chuan chiang zetin a pet goal a, an goal thumna a thun. Sancho goal thun hnu hian goal dang a luh belh thei tawh lova, United chuan an mikhual Leicester City laka si thum fai ngawtin hnehna an chang a, champion tumin hma lam an pan zel.
United hian EPL ah vawi 24 khelin point 49 an hmu a, pathumna ah an awm mek. An chung chiaha awm Manchester City nen an inkarah point thum chauh a la tla zep tawh a. Hmahruaitu Arsenal an phak lohna pawh point nga chiah a ni tawh bawk a, hmasawn chak tak United hi EPL ah an champion nawlh a nih pawhin thil mak a ni hauh lo ang.
Palinaah Tottenham
Pathianni zana inkhe dangah Tottenham chuan an mikhual West Ham United chu si hnih faiin an lo hneh a, top 4 huangah an inhlangkai.
London club pahnih; Tottenham leh West Ham te hi an inhnehtawk viau a, goal pawh a lut lawk thei lo. Minute 56-naah Emerson Royal chuan Tottenham tan hmahruaina goal a thun a. Minute 72-naah Son Heung-Min chuan Spurs goal hnihna a thun zui leh bawk. Hun tawp thlengin goal dang a luh belh thei lova, Spurs in si hnih faiin hnehna an chang a, point thum hlu tak an hmu.
West Ham lakah si hnih faia hnehna chang Tottenham hian vawi 24 khelin point 42 an hmu a, Newcastle lehpelin pathumnaah an inhlangkai a, Magpies aiin an khel tam zawk hret thung.
United an chak awlsam
