Ningani zan khan UEFA Europa League khelh chhunzawm a ni a. Inkhel hmuhnawm takah Manchester United chuan 2-1 in mualneitu Viktoria Plzen an hneh. United an chak laiin EPL club lian Tottenham Hotspurs chuan hnehna an chang zo lo ve thung.
Season kal mekah beisei anga chetha tluang thei tak tak lo Manchester United chuan Mimualah Viktoria Plazen an hmachhawn a, si an phurh hmasak zet hnuin hnehna an chang let. Mimuala hnehna an chang vangin United hian Europa League-ah top 6 huang an luah phak ta chiah.
Doosan Arenaah mual neitu Viktoria Plazen leh Manchester United te an inhnehtawk viau a, chawlhlawk hmain goal thun thei an awm lo. Chawlhlawk hmain goal lut awm lo mah se chawlhlawk hnu lamah goal thum ngawt a lut ta thung. Second half tan atanga minute thumna lekah Matej Vydra chuan hmahruaina goal a thun. Team lian United lakah hmahruaina goal an thun vangin phur viau mah se Viktoria Plazen an phur rei lova, goal an chhuah thuai.
Goal an chhuah vanga hnual lo United tan hian Denmark forward Rasmus Højlund chuan minute 62 naah hmahruaina goal a thun. An si phurh an sut vangin United an phur a, hnehna chan ngei tumin an inlan chhunzawm. Ruben Amorim team team United hian hnehna chan ngei tumin tan an khawh zui a, minute 88-naah Rasmus Højlund chuan hma an hruai letna goal a thun a. He goal hi Red Devils hian an chakpui zui ta a ni.
Mimualah hnehna an chan vangin United hian khelh ruk atangin point 12 an hmu a, pa ruknaah an inhlangkai. Hetihlai hian Viktoria Plazen erawh chuan 17-na an luah ve thung.
United in hnehna an chan laiin EPL club lian Tottenham Hotspurs erawh chuan hnehna an chang zo lova, an Mikhual an nihna hmunah mualneitu Rangers nen 1-1 in an inhnehtawk a, point khat ve ve an hmu.
United an chak leh ta e
