United an chak thei lo

Ningani zan khan Europa League 2024-25 khelh chhunzawm a ni a, English club lian Manchester United in hnehna an chang thei lo. United an chak zawh loh laiin an mualah Tottenham an chak ve thung.
United an chak zo lo
English Premier League (EPL) ah 11-na ni mek Manchester United hi an manager hlui Jose Mourinho enkawl Fenerbahce hmachhawn turin Ulker Stadyumu, Istanbul-ah an lenglut. An len luhna mualah bul tan thain, goal thun hmasa zawkah tang bawk mah se hnehna an chang zo lo. United hian Europa League season tharah vawi thum an khel tawh a, an khingpui tute mah an la hneh lova, tute mahin an la hneh rih lo bawk.
Ulker Stadyumu a lenglut United tan hian Denmark midfielder Christian Eriksen chuan Joshua Zirkzee siamsak atangin minute 15-naah hmahruaina goal a thun. Hma takah goal an thun vangin inrintawkna sang zawk leh phur zawkin Mimualah an inlan. Mourinho enkawl Fenerbahce lakah point thum hmuh tum tak chungin an inlan a, si khat faia hmahruai chungin chawlhlawk an hmang.
Chawlhlawk hmain goal thun thei lo mah se Turkish club lian Fenerbahce hian chawlhlawk hnu lamah goal an thun ta thuai thung. Second half tan atanga minute lina lekah Youssef En-Nesyri chuan goal thunin an si phurh a sut. An si phurh an sut hnuin Turkey club lian hian chak ngei tumin tan an khawh a, goal pawh an thun teuh hle. Hlauhawm taka nawrin, goal thun teuh viau mah se si nghak Andre Onana an paltlang zo lo. Onana hian pui zetin save a nei zawn a, pui taka save a nei zawn hi Mourinho ngei pawhin mak a ti hle nghe nghe. Onana hian United tlawm tur a chhan him a, Mimualah point khat an hmuh theih phah.
Tarlan tawhin Manchester United hian Europa League season tharah vawi thum an khel tawh a. Chak an la nei lova, tlawm an la nei hek lo. Khelh thum atangin point thum an hmu a, 21-naah an awm mek. Hetihlai hian Fenerbahce erawh chuan khelh thum atangin point 5 an hmu ve tawh thung.
Tottenham an chak
Fenerbahce lakah United an chak zawh loh laiin London club lian Tottenham Hotspurs chu an mikhual AZ Alkmaar lakah harsa takin an chak ve thung.
Tottenham hian an mualah AZ Alkmaar an mikhual a, Richarlison chuan minute 53-naah penalty atangin hmahruaina goal a thun. AZ Alkmaar hian an si phurh sut tumin tan khawh nasa viau mah se hun tawp daihah an vanduai a, an player David Wolfe chu minute 85-naah hnawhchhuah a ni. Si phur zawk ni chunga tlem zawk an nih zui leh vangin AZ Alkmaar hian goal an thun thei lo tluan a, EPL club lian Tottenham lakah an tlawm zui ta a ni.
United an chak theih loh laiin Europa League-ah Tottenham an chak zel thung. Tottenham hian vawi thum hnehna an chang zawn tawh a, point kua hmuin pahnihnaah an awm mek a ni.
Manchester United nen an inhmachhawn tum hian manager boruak nei lian tak Jose Mourinho chuan hnawhchhuah a tawk nghe nghe. A club hlui United hneh a tum luatah a insum tluantling thei lo a ni ber mai a. A zia a la danglam tak tak thei lo a ni.
Result dang
Ningani zana inkhel dangah season thara khel tha tak Italian club Lazio chuan Mimualah si hnih faiin hnehna an chang leh a, hnehna la chang vekin table chung berah an awm.
Lazio hi De FC Twente hmachhawn turin Grolsch Veste-ah an leng lut a, minute 11-na lekah mualneitu player Lars Unnerstall hnawhchhuah a ni. Lazio hian tam zawk an nih an chhawr tangkai a, Pedro chuan minute 35-naah hmahruaina goal a thun a. Hun rei tak chhung si khat faia hma an hruai hnuin hun tawp dawn hnaih minute 87-naah Gustav Isaksen chuan an goal hnihna a thun zui leh a, an chakna a nemnghet zui ta a ni.
Lazioa an chak lai hian Italian club AS Roma pawhin hnehna an chang ve bawk. Roma hian an mikhual Dynamo Kyiv chu Artem Dovbyk penalty goal thun hmangin harsa takin an hneh.