April 17, Ningani zan khan Europa League quarter-final khelh zawh a ni a, goal 9 ngawt luhna inkhel hmuhnawm takah Harry Maguire goal thun hmangin Manchester United an chak a, semi-final an lut. United rual hian Mimuala chak Tottenham Hotspurs in semi-final an lut ve zawk.
United 5-4 Lyon
EPL club lian Manchester United hian quarter-final thawhkhatnaah hnehna an chang zo lova, Lyon nen 2-2 in an inhnehtawk. Quarter-final thawh hnihnaah pawh team hnihte an inhnehtawk leh viau. United hi an mualah an tlawm teuh hle a, minute minute 110 an khel lai mekin 4-2 in hnufual zawk an la ni a, Europa League atangin an puanthuah an tel fel ngei tura ngaih a ni hman. An mualah hnufual zawk ni reng mah se hun tawp dawnah thil mak an thlentir a, hun tawp dawn tepa Harry Maguire goal thun hmanga chakin, inlehthalna lian, mak, mawi leh ropui an thlentir.
United hian Old Trafford-a an mikhual Lyon lakah bul an tan tha viau a, chawlhlawk hmain goal hnih an thun hman. United tan hian Manuel Ugarte chuan inkhel tan atanga minute 10-na lekah hmahruaina goal a thun a, 2-0 a hmahruai chungin chawlhlawk an hmang.
Chawlhlawk hnu lamah Lyon an khel tha ve thung a, goal hnih an thun ve leh. Lyon tan hian Corentin Tolisso chuan minute 71-naah goal thunin an si phurh a sut then a. Goal an thun atanga minute ruk hnu lekah Nicolás Tagliafico chuan goal thunin an si phurh a sut zo. Tagliafico goal thun hnu hian goal dang a luh belh tawh rih lo va, hun pangngaiah chak zawk an awm thei lo.
Minute 90 chhungin chak zawk an awm thei lova, si belhkhawmah 4-4 a an inhnehtawk bawk vangin extratime khelh chhunzawm a ni. Extratime-ah Lyon in bul an tan tha viau a, Rayan Cherki chuan minute 104-naah hma an hruai nawn lehna goal a thun a. Arsenal forward hlui Alexandre Lacazette chuan an goal lina a thun zui leh a, United lakah 4-2 in hma an hruai a, semi-final an hnaih hman hle.
Dinhmun chhe takah ding mah se United an huaisen a, zam eih lovin an mikhualte an nawr let. Goal thun mamawh United hian penalty an hmu a, captain Bruno Fernandes chuan minute 114-ah penalty pet goal in an si phurh a sut then. Fernandes goal thun hnu hian United an phur zui viau a, an mikhualte an nawr na hle. Hun tawp dawn tep minute 120-naah Kobbie Mainoo chuan goal thunin an si phurh a sut zo ta nge nge. Tie-break hmanga chak zawk zawn a ngai ngei tura ngaih a nih laiin United in thil mak an thlentir nawn leh. Sawisel hlawh nasa thei tak Harry Maguire chuan minute 120+1-ah a tauh goal a, hma an hruai letna goal a thun. Maguire goal thun hmangin United in hnehna an chang a, semi-final an lut.
United rual hian Tottenham Hotspurs, Athletic Bilbao leh Bodo/Glimt ten Europa League semi-final an lut ve bawk. United in Athletic Club an tum ang.
United chakpuitu Maguire
