March 9, Ningani zan khan UEFA Europa League last 16 first leg khelh a ni a. Premier League club lian Manchester United chuan Old Trafford-a an mikhual Real Betis chu 4-1 in an hneh a, quarter-final lut turin dinhmun tha takah an ding. An hmelma lian ber Liverpool lakah nasa taka mualpho in, an elpui lian lakah dawl zawr taka an zawr hnu lawkah United chu United an ni tih an lantir a. Inkhel an hmachhawn lehna hmasa berah phu takin hnehna an chang a, kawng dikah an kir.
United hian Old Trafford-a an mikhual Real Betis lakah an khel tha viau a, goal pawh an thun hma hle. Wout Weghorst goal thun hnawl a nih hnu lawkah Marcus Rashford chuan chiang zetin a pet goal a, minute rukna lekah hmahruaina goal a thun. An mikhual lakah goal thun hma viau mahse goal dang an thun belh thei mai bik lova, goal an chhuah ta hial zawk. Minute 32-naah Ayoze Pérez chuan goal thunin an si phurh a sut a. 1-1 a inhnehtawk chungin chawlhlawk an hmang.
Chawlhlawk hnu lamah United an khel tha nghal viau a, goal pawh an thun leh thuai. Minute 52-naah Bruno Fernandes siamsak atangin Antoni chuan hma an hruai nawn lehna goal a thun. Hma an hruai nawn leh hnuin United in an khel tha leh zual sauh a, goal thun belh tumin an mikhualte an nawr na hle. Na taka an khingpuite an nawr chhawr tangkaiin goal an thun belh leh thuai. Minute 58-naah captain Bruno Fernandes chuan an goal thumna a thun. Liverpool laka an tlawm tumin United captain Fernandes hian duhkhawp a hlawh lo viau a, sawiselna a tawk zui nasa hle. Captain atanga ban duh hial khawpin sawisel nasa mah se Real Betis lakah erawh hruaitu tlak a nihzia a lantir a, fak a hlawh leh ta thung.
Khelmual ropui Old Trafford-ah 3-1 ngawta an hnufual vangin Spain club tan chet a har viau tawh a, goal chhuah tam lo turin tan an khawhzui a ni deuh chawt tawh. Hun rei tak chhung goal chhuah belh loin him hram thin mah se hun tawp dawnah goal an chhuah belh leh ta nge nge. Minute 82-naah forward palian Wout Weghorst chuan United goal lina a thun a, an hmahruaina a ti zau. Wout Weghorst goal thun hnu hian goal dang a luh belh thei tawh lova, United chuan 4-1 in hnehna an chang ta a ni.
An mualah 4-1 ngawta an chak vangin Manchester United hian quarter-final an hnaih viau tawh. Erik ten Hag hnuaiah United hi League Cup-ah an champion tawh a. Europa League-ah pawh champion tura rinkai an ni. Barcelona an hnawhchhuah hnuin United hian rin an kai lehzual sauh.
United chu United, an chak
![](https://theaizawlpost.org/wp-content/uploads/2023/03/uni-1.jpg)