United in puanthuah an tel

December 19, Ningani zan khan English Corabao Cup quarter-final khelh zawh a ni a, goal sarih ngawt luhna inkhel, inkhel hmuhnawm zetah mualneitu Tottenham Hotspurs in Manchester United an hneh. Tottenham lakah an tlawm vangin Carabao Cup atanga tlain United in an puanthuah an tel fel.
Tottenham hian manager thar Ruben Amorim hnuaia bul tan tha, phur tharna sang taka nena inlan Manchester United lakah bul an tan tha a, goal pawh an thun hma hle. Inkhel tan atanga minute 15-na lekah Dominic Solanke chuan hmahruaina goal a thun. Hma takah goal an thun vangin United hian inrintawkna sang zawk an nei a, an mualah phur takin an inlan. Goal thun hmasa zawkah tangin phur viau mah se Spurs hian goal an thun belh lawk thei lo. United pawhin hun tha nei bawk thin mah se goal thun turin an vannei rih lo, si khat faia hnufual chungin chawlhlawk an hmang.
Chawlhlawk hmain goal khat chauh lut mah se chawlhlawk hnu lamah inkhel a hmuhnawm leh zual a, goal ruk ngawt a luh belh. Hmahruaitu Spurs an khel tha chhunzawm viau a, inhnaihchilh takin goal an thun zawn. Mualneitu Tottenham tan hian Dejan Kulusevski chuan second half tan atanga minute khatna lekah an goal hnihna a thun a, an hmahruaina a tizau. Kulusevski goal thun hnu lawk hian goal hmahruai thuntu Dominic Solanke chuan minute 56-naah an goal thumna a thun zui leh zat a, team lian United lakah si thum fai ngawtin hma an hruai zui ta a ni.
Si thum fai ngawtin hnufual tawh mah se United chu United an ni a, an zam lo. An hnual lova, an beidawng hek lo. Sir Alex Ferguson hnuaia huaisenna an neih thin kha Amorim hnuaiah an nei thar leh a, huai takin Tottenham an nawr let. Red Devils tan hian Joshua Zirkzee chuan minute 63-naah goal thunin an si phurh a sut then. He goal hian nasa takin United a fuih phur a, tha tho takin an inlan thar leh. Goal thun belh tumin thapui an chhuah a, an hlawhtling zui leh bawk.
Zirkee goal thun hian a fuih phur tha bawk United che vel a hmuhnawm a, an khingpui tlarhnung an chhiahbuai thei hle. An goal khatna an thun atanga minute sarih hnu lekah Amad chuan goal a thun zui leh. Amorim hnuaia vul thar tak Amad hian Pathianni zan khan Manchester City lakah chakna goal a lo thun tawh a. Team lian Tottenham lakah goal thun zui lehin a chetha chhunzawm zel.
United in goal hnih an thun zawn hian chak tura inngaia inthlahdah tawh Tottenham a cho harh thar leh a, an muthu a kaitho thar leh. Goal hnih an thun zawn vanga United phurna sang tak chu khap dai tura goal thun thuai an mamawh tih an hria a, an mamawh chhanna nei turin an thawkrim zui viau bawk. United phurna tuipui fawn anga phul bulh bulh tawh bengdai turin captain Son Heung-Min chuan hun tawp dawn hnaih minute 88-naah an goal lina a thun zui leh a, chak tur zawk a chiang tawk viau tawha ngaih a ni nawn leh ta chiah bawk.
Goal chhuah belh lehin an dinhmun chhe thar leh mah se United an beidawng duh chuang lo. Tottenham lakah tlawm pumpelh ngei tumin tan an khawh zui leh chiam a, tlawm an pumpelh teuh hle nghe nghe. Hun tawp dawn hnaih minute 90+4ah defender Jonny Evans chuan goal thunin an si phurh a sut then leh. Evans goal thun vangin beiseina an nei thar leh a, hun tlem le awmah goal thun tumin tan an khawh nasa hle. United in na taka an nawr karah goal chhuah belh em lovin Tottenham an him tluan hram a. An mualah harsa taka hnehna changin Carabao Cup semi-final an inhlangkai a. Champion tura rinkai zinga mi Manchester United erawh chuan an puanthuah an tel fel ve thung.
Harsa taka United hnawtchhuaktu Tottenham hian Semi-final-ah khingpui hautak zawk an nei zui leh dawn a, he inelnaa vawi 10 champion tawh Liverpool an hmachhawn dawn. Liverpool hi manager thar Arne Slot hnuiah an khel tha tluang viau a, English Premier League leh UEFA Champions League-ah hmahruaitu an ni mek. An khelh that lai a nih vangin Liverpool hmachhawn hi tute team tan mah thil chakawm a ni lo ang.
Liverpool hi Tottenham mualah an lenglut hmasa ang a. Anfield-ah second leg an khel thung ang. Liverpool leh Tottenham an inhmachhawn lai hian semi-final lehlamah Arsenal leh Newcastle United an inhmachhawn ve thung dawn. London hmar veng club lian Arsenal leh Tottenham te hi inelna lian final-ah an la intum ngai lova. Carabao Cup semi-final-ah an chak ve ve a nih chuan final-ah a vawi khat nan an intum ang.
Carabao Cup semi-final thawhkhatna hi January ni 6-ah khelh a ni ang a, thawh hnihna hi February ni 3-ah khelh a ni thung ang.