English club lian Manchester United chuan thla 14 an rawih hnuah an manager Reuben Amorim chu thawhtanni khan an ban ta nge nge. Amorim hi hmunruak hi United midfielder hlui Darren Fletcher-a’n a luah rih ang.
Reuben Amorim hian kum 2020–2024 chhung khan Sporting CP a enkawl a, a chetthatpui em vangin manager hriathlawh a ni chho. Sporting CP-ah a hming a chher len hnuin English club ropui Manchester United in November, 2024 khan Erik ten Hag hmunruak luahtu atan an la lut. Amorim hnuaiah beiseina sang tak nen inlan bawk mah se beisei erawh an phak tak tak thei lo thung.
Amorim kaihruaina hnuaiah United in inkhel vawi 63 an hmachhawn a, heng zingah vawi 24-ah hnehna changin, EPL-ah vawi 15 chauh hnehna an chang. EPL 2024-25-ah khan 15-na ni chungin season an khar a, top flight huangah kum 1974 hnu lama an chetchhiat ber tum a ni hial nghe nghe. Season liam taah chhe takin a tawp khar bawk mah se United in Amorim chungah dawhtheihna lantirin, a lakah beiseina an nei chhunzawm.
Nipui bazar laiin United hian an squad thuamchak hna an thawk a, Amorim-a duh zawng player an la lut. Player thar lak nan £216m zet an seng hial a, an lak luh langsar zualte chu; Bryan Mbeumo, Benjamin Sesko, Matheus Cunha leh Senne Lammens te an ni. Manto taka an lak luh Sesko-a’n beisei a phak rih lo viau a, Sesko hi Amorim phur tirit zualtu pakhat a ni. Phur takin season tharah bul tan bawk mah se an chetha tluang tak tak thei lova, chak zawn an harsat tlat zel. December 26, ah Newcastle United an hneh vangin phur viau mah se ni li hnu lekah table mawngphaha awm Wolves nen an inhnehtawk leh mai bawk. Wolves nen an inhnehtawk hnu lawkah table hnuai lama awm tho Leeds United nen 1-1 in an inhnehtawk zui leh bawk. EPL season kal mekah United hian vawi 20 an khel tawh a, vawi riat chakin, draw vawi sarih an nei a, tlawm zawkah vawi nga an tang tawh. Khelh 20 atanga point 31 hmuin parukna an luah mek a. Hmahruaitu Arsenal nen an inkarah point 17 zet a tla zep tawh thung. Beisei ang result an neih loh zawn hnuin manager laka an dawhtheihna a kin ta a, an inban zui ta a ni.
Reuben Amorim hmunruak hi United midfielder hlui, tuna United Under 18 team enkawl mektu Darren Fletcher an a luah rih dawn. Fletcher hian United tan inelna hrang hrangah vawi 342 a khel tawh a, goal 24 a lo thun tawh. United hi EPL-ah vawi nga ngawt a champion pui tawh a, Tualchhunga inelna lian dang FA Cup leh League Cup-ah te a champion tawh bawk. Tualchhunga inelna lian hrang hranga a champion pui bakah Champions League leh Club World Cup-ah a champion pui tawh bawk. United under 18 team a enkawl hma hiankum 2021 – 2024 chhung khan United technical director a lo ni tawh bawk.
United in Reuben Amorim an ban
