United lakah Arsenal an tlawm

Pathianni zan khan English Premier League 2025-26 khelh chhunzawm a ni a, inkhel ngaihven hlawh takah table-a hmahruaitu Arsenal chu an mikhual Manchester United hneh lovin an tlawm. Arsenal an tlawm vangin EPL-ah champion tuma inelna boruak a nung thar leh zual. Arsenal an tlawm lai hian Aston Villa leh Chelsea ten hnehna an chang ve thung.
Team huaisen United
English team hlun leh hlawhtling Manchester United hian season an hmang tha lo viau a, champion beiseina tur an nei tawh lo hial. An chetchhiat vangin manager Reuben Amorim an ban a, manager lailawk atan an midfielder hlui leh an manager lailawk lo ni zuai tawh Michael Carrick an la lut. Carrick hnuaiah United in phurna leh huaisenna an nei let leh. Team lian Manchetser City an hneh hnuin table-a hmahruaitu Arsenal an hneh zui leh ngat bawk. Sapui muthlu kaihthawhin an awm a, team huaisen leh huphurhawm tak an ni leh der tawh.
United hian season kal mekah an muala la tlawm miah lo Arsenal lakah bul an tan tha lova, goal chhuah hmasa zawkah an tang nghe nghe. Chak tura rinkai zawk ni lo chiang viau mah se an huaisen leh an thawhrim zarah hnehna lian sualchhuakin khawvel an barakhaih. Point 7-a hmahruai fal leh thei tura chak mamawh Arsenal hian United hneh nawn leh ngei tumin an mualah tan an khawh a, bul pawh an tan tha viau. Inkhel tan tirh lamah goal an thun nghal teuh hle a, Martin Zubimendi tauh hlauhawm zet mai chu si nghak Semme Lammens chuan pui zetin a lo dang hman hlauh a, an team a chhan him. United pawhin hun tha nei bawk mah se an chhawr tangkai thei bik lo.
An hun tha neih hmasak hlah bawk mah se Arsenal in goal an thun hmasa ta nge nge. Lisandro Martínez chuan vanduaithlak takin an lamah a dang goal palh a, minute 29-naah Arsenal hmahruaina goal a thunsak. Chak tura rinkai zawkin goal an thun hmasak vangin United dinhmun a chhe viau a ngaih a ni a, Arsenal chu point thum hmu ngei tura ngaih an ni hman hial.
Goal an chhuah hnuin United in an si phurh sut ngei tumin tan an khawh zui nghal. Goal thawkchhuak mai thei lo mah se Zubimendi tihsual vangin goal khilai an ni a, vengtu nei lova awm fal Bryan Mbeumo chuan minute 37-naah harsatna tawk lovin a pet goal a, an si phurh a sut. He goal hian United a fuih phur leh zual a, inkhel a hmuhnawm zui viau.
Chawlhlawk hmaa goal lut a awm belh theih loh hnuin, chawlhlawk hnu lamah goal a luh belh leh thuai. Minute 50-na lekah Martin Zubimendi tihsual leh taimak tawk loh vangin Patrick Dorgu chuan hun tha a nei a, pui zeta pet goal in hma an hruai letna goal a thun. United in hma an hruai let hian inkhel a tihmuhnawm leh zual a, Arsenal in an si phurh sut tuma tan an khawh a hmuhnawmin, inringtawk taka United in lan hmuh an nuam viau bawk.
Inkhel hmuhnawm takah goal a luh belh theih loh reng hnuin Arsenal manager Mikel Arteta chuan a player pali a thlak rual thawt a, na zawkin an mikhualte an nawr. Ball kanga hlauhawm thin Gunners hian goal an thawkchhuak leh ta nge nge a, bench atanga lut Mikel Merino chuan minute 84-naah goal thunin an si phurh a sut. An si phurh an sut vangin Arsenal an phur a, an mualah chak ngei an inring hmn hial bawk. Phur viau mah se Gunners an phur rei lova, goal an chhuah belh leh ta thuai thung. Bench atanga lut Matheus Cunha chuan minute 87-naah pui zetin a pet goal a, United hmahruai nawn lehna goal a thun. Cunha goal ropui hi Arsenal in an sut thei tawh lova, United lakah tlawm an tlawm zui ta a ni.
Manchester United lakah an tlawm laiin an elpui lian Manchester City leh Aston Villa ten hnehna an lo chang ve ve si a, Arsenal hmahruaina a pan a, champion turin kawng harsa zawk an zawh a ngai dawn. Gunners hian point liin hma la hruai bawk mah se champion turin rin ngam an har viau thung.
Season kal mekah an muala la tlawm lo Arsenal hnehtu Manchester United chu top 4 huangah an kir a, sang zawka invawrh tumin tan an khawh zui ang. United hian Arsenal muaalah chak an harsat thin a, 2017 hnu lama a vawi khat nan Pathianni zan khan phu takin hnehna an chang ta nge nge a ni.
Aston Villa an chak
Season kal meka chetha tak, table-ah pathumna luah mektu Aston Villa chu Pathianni zan khan Newcastle United hmachhawn turin St James Park-ah an lenglut. Mikhual an nihna hmunah tha takin an inlan a, si hnih faiin hnehna an chang. Newcastle lakah an chak vangin Aston Villa hian champion beiseina sang zawk an nei thar.
Aston Villa hian mikhual an nihna hmunah bul an tan tha a, a tawp an khar tha bawk. Inkhel tan atanga minute 19-na lekah Emiliano Buendía chuan hmahruaina goal a thun nghal. Hma taka goal an chhuah hi Newcastle in an sut thei lo reng a, hun tawp dawn tepah goal an chhuah belh leh ta zawk. Villa tan hian Ollie Watkins chuan hun tawp dawn hnaih minute 88-naah an goal hnihna thunin an chakna a nemnghet a. St James Park-ah hnehna changin point thum hlu tak an hmu zui ta a ni.
Newcastle hnehtu Aston Villa hian khelh 23 atangin point 46 an hmu a, an chung chiaha awm City nen an point hmuh zat a inang a. Hmahruaitu Arsenal an phak lohna chu point li chiah a ni tawh.
Pathianni zana inkhel dangah manager thar nei Chelsea an chetha chhunzawm a, London derby-a an khingpui Crystal Palace chu 3-1 in an hneh. Blues hi manager thar Rosenior hnuaiah an chak chho zel.