Pathianni zana English Premier League inkhel ngaihven hlawh takah Manchester United leh an mikhual Chelsea te chu 1-1 in an inhnehtawk. United leh Chelsea an inhnehtawk laiin Tottenham chuan an mikhual Aston Villa an lehthal ve thung.
Old Trafford-ah Manchester United leh Chelsea te hian inkhel hmuhnawm an lantir. Manager lailawk Ruud van Nistelrooy enkawlna hnuaiah United an khel tha chhunzawm a, an mualah chak phuin an inlan. Hlauhawm taka an khingpuite nawrin, goal thun theihna hun tha nei bawk mah se goal an thun lawk thei lo. Season thara khel tha Chelsea pawhin hlauhawm siam thin mah se hun rei tak chhung goal an thun thei bik lo.
Inkhel hmuhnawm takah goal lut a awm theih loh reng hnuin mualneitu United an vannei a, penalty an hlawhchhuak. Si nghak Sanchez-a’n a tihtluk vangin United forward Rasmu Hojlund chuan penalty a hlawhchhuak. He penalty hi captain Bruno Fernandes chuan awlsam takin a pet goal a, minute 70-naah a pet goal a, United hmahruaina goal a thun. Chelsea laka goal a thun hi Bruno Fernandes-a’n season kal meka EPL a goal khat a thunna a ni nghe nghe.
Goal an chhuah hnuin Chelsea an khel tha zual sauh a, Pedro Neto a hnawksak thei hle, Blues hian corner atangin goal an thun ta nge nge. Corner atanga ball kal hi Moisés Caicedo chuan fuh zetin a pet goal a, minute 74-naah an si phurh a sut.
Goal khat ve ve an thun hnuin inkhel a hmuhnawm zui viau a, Chelsea an hlauhawm zawk mah. Old Trafford-ah hnehna chan ngei tumin Blues hian tan an khawh a, mualneitu an nawr nasa hle. Ball chang tam zawk ni mah se Maresca team te hian goal an thun belh thei lo va, United in goal an thun belh thei lo bawk. Team lian United leh Chelsea te hi 1-1 in an inthathen ta a ni.
An mualah an chak zawh loh vangin United hian table laihawl hnuai lam an chhuahsan thei rih lo va, khelh 10 atanga point 12 hmuin 14-naah an awm mek. Hetihlai hian season bul tan tha Chelsea chuan khelh 10 atanga point 18 hmuin palina an luah ve thung.
Pathianni zana inkhel dangah Tottenham chuan season thara khel tha tak Aston Villa chu 4-1 in an lehthal a, point thum hlu tak an hmu.
Tottenham muala lenglut Aston Villa tan hian Morgan Roger chuan minute 32-naah hmahruaina goal a thun a, 1-0 a hmahruai chungin chawlhlawk an hmang.
Chawlhlawk hmain goal thun thei lo mah se chawlhlawk hnu lamah Spurs an khel tha viau a, goal li ngawt an thun. Second half tan atanga minute lina lekah Brennan Johnson-a’n goal thuna an si phurh a sut hnuin Dominic Solanke chuan goal hnih a thun zawn a, 3-1 in hma an hruai let. 3-1 a hma an hruai hnuin hun tawp dawn tep minute 90+6-ah James Maddison chuan an goal lina a thun zui leh a, Spurs hian an mualah 4-1 in hnehna an chang zui ta a ni.
Tottenham laka tlawm Villa hian parukna an luah a, an hnuai chiahah an hneh loh Tottenham an awm mek.
United leh Chelsea an inhnehtawk
