US President Joe Biden chuan Israel-in Iranian senior officer te a tihhlum hnuah Tehran in a beih theih mainaah Israel chu a ‘tan bur’ tiin a sawi.
Ni 10 kalta lawka Syria-a Isreael-in Iranian consulate a beih hnuah Iran chuan Israel lakah thungrulh nan chetlak a tum tiin Biden chuan a sawi a.
“Israel security humhim turin kan theihtawp kan chhuah ang” tiin President Biden chuan a sawi.
A hmain Iran leader chuan Israel-in Damascus-a an consulate a bei chu Iran bei nen thuhmun reng a lo ti tawh a.
“Kan consulate area an beih khan kan territory bei ang an ni” tiin Ayatollah Ali Khamenei chuan television kaltlanga thusawina a neihah a lo sawi tawh a. “Evil regime hi hrem a ngai, hrem an ni bawk ang” tiin a sawi bawk.
Engtiangin nge Iran chuan phuba lak a tum a hriat loh a. Iran-in Israel a kap pawp a nih chuan buaina nasa zawk a chhuak dawn a, analysts te chuan nasa taka Israel bei turin Iran chuan military lamah theihna a nei sang lo an ti.
A tih theih tura ngaih chu Iranian proxy Hezbollah te Israel, a khat tawka thenawm Lebanon atanga bei fotute chu a hmang thei bawk.
Pathianni khan Iranian official te chuan Israel embassy te chu ‘a him tawh lo’ tiin an sawi a, chumi awmzia chu Israel consulate building chu beih ve an tum anga ngaih theih a ni. Hei bakah hian Iran chuan cyberattack hmang pawhin Israel chu a bei thei bawk.
April 1-a Israel-in Iranian consulate building a beih khan mi sawm pathumin nunna an chan a, senior Iranian military leader an thi nual a ni.
Israel chuan a tih a nih thu a sawi miah lo chungin Israel tih ngeia ngaih a ni a. Khata tang khan US leh Israeli forces te chu inralring rengin an awm tawh a ni.
“Prime Minister Netanyahu hnena ka sawi tawh angin Iran leh proxy te lakah Israel chu kan hum tlat dawn” tiin a sawi.
A hma lawkah erawh Biden chuan interview a neihnaah Gaza-ah inkahhai ngiatin Netanyahu war strategy chu a sawisel bawk a. Netanyahu chuan Gaza-ah tihsual a nei a ni tiin a sawi.
Kar kalta lawka Gaza-a aid worker pasarih te convoy Israel-in a beih avanga nunna chan an awm avangin Biden chuan na takin Netanyahu chu a lo sawisel tawh bawk.
US officials te chuan Biden leh Netanyahu te chuan ngaihdan inang lo nei mah se Israel-in beih a tawk a nih ngat chuan US chuan a pui nghal dawn tiin an sawi bawk.
United States-in Israel chhan tlat dawn
