United tan fiahna hautak

United tan fiahna hautak
Zanin dar 11:15 atangin UEFA Champions League 2023 khelh chhunzawm a ni dawn a, Group A – D ten group match hnuhnung ber an khel ang a, last 16 lut tur, Europa League khel tur leh tla tur zawng zawng tihchian vek a ni tawh dawn. Team lian zingah Manchester United in fiahna hautak an hmachhawn dawn a, last 16 lut turin Bayern Munich an hneh ngei ngei a ngai dawn.
Manchester United hian Old Trafford-ah German champion Ba-yern Munich an mikhual dawn a. Group A table mawngphaha awm mek an nih vangin last lut turin group champion nia tlang chiang tawh Bayern lakah chak ngei ngei an ngai tawh a. Bayern Munich an hneh a nih pawhin FC Copen-hagen leh Galatasaray te an lo inhnehtawk a ngai ve tel bawk a, an din-hmun a khirh viau tawh.
United tan tun hi Bayern Munich hmachhawn tura hun duhawm a ni lo. Inrinni zan khan Old Trafford-a an mikhual AFC Bournemouth lakah si thum fai ngawtin an tlawm a. An boruak hniam lai a ni. United hi an chak loh hnuah an khelh leh hmasak bera hlauhawm thin an ni a. Tunhmaa an zia ang kha an chhuah thei a nih chuan Bayern Munich tan an huphurhawm thei viau ang. United leh Bayern te hi season kal mekah hian an lo inhmachhawn tawh a, Allianz Arena-ah Bayern in 4-3 in hnehna an chang.
Bayern Munich tan pawh tun hi Manchester United hmachhawn tura hun tha a ni bik lo. Inrinni zana an khingpui Eintracht Frankfurt lakah 5-1 ngawtin an tlawm ve bawk. Frankfurt lakah an tlawm vangin hmahruaitu Bayer Leverkusen nen an inkarah point li a tlak zeh phah bawk. An tan chuan United hmachhawn hi inkhel awmze nei a ni tawh lo. An chak emaw, an tlawm emaw pawh ni se Group champion ni chungin last 16 an lut tawh sa hrim hrim. Hei vang hian rawlthar zawk leh khelhna hmun chang tlem zawkte tan hun an pek a rinawm a. An that dan ang bera an inlan lo hlauh a nih chuan United chak theih beiseina sang zawk an nei thei ang. Bayern Munich lakah an tlawm a nih erawh chuan manager Erik ten Hag hma lam hun a chiang lo lehzual hle thung ang.
Group A atang hian FC Copenhagen leh Gala-tasaray ten inkhel pawimawh tak an hmachhawn ve dawn bawk a. An inkhela chak zawk zawkin pahnihna ni chungin last 16 an lut ang a. Parken, Copenhagen a inkhela chak zawk an awm a nih chuan Bayern Munich lakah United chak teh reng pawh ni se Red Devils hian last 16 an lut phak dawn chuang lo.
Group B lamah champion ni chungin Arsenal an tlang tawh a. Zanina an khingpui tur PSV Eindhoven pawh chhiarkawp dan chuan tla thei la ni bawk mah se, tlang tluk a ni tawh tho bawk.
Group C atangin Real Madrid an tlang chiang tawh a, Serie A club lian Napoli in tlang theihna hun tha tak an nei a. Last 16 lut turin an mikhual Braga laka tlawm an pumpelh a ngai. An mualah an chak lo a nih pawhin goal thuma tlawm an pumpelh theih chuan an tlang tho dawn bawk.
Group D atangin Real Sociedad leh Inter Milan te an tlang chiang tawh a. Anni pahnih hi San Siro-ah intumin, champion an inchuh zui dawn a, inkhel hmuhnawm tak an lantir theih ngei a beiseiawm viau. Inkhel hi 11:15 atangin en tur a awm tan ang.