Upa berah Buangi puang
Social Welfare department-in a zirchianna atangin Mizorama damlai zinga upa ber chu Lalneihsangi @ Buangi (109), tuna Khatla-a cheng mek nia hriat a ni a. Social Welfare minister Lalrinpuii’n Inrinni khan an department hmingin upa berah a puang.
Minister chuan an zirchian hnua Mizo zinga upa ber nihna Pi Buangi’n a chang thei chu a lawmpui tih a sawi a. Social Welfare department chu sawrkar department-ah chuan kum upa lam changtu a ni a, upate pension an pek thin bakah kumtin Upate Ni a hmang thin tih a sawi. Upate tan Home, Day Care Centre siam belh a nih theihnan sawrkar laipuiah thlen a ni tawh tih a sawi bawk.
“Khawvel changkang zelah Mizoramah ngei pawh upa an tam belh zel a. Social Welfare Department-in a chhut dan chuan kum upate hi Mizoramah 70000 chuang awmin, kum 2036 ah chuan nuai 1 an tlin ve tawh rin a ni. Mizote chuan aia upa zah hi kan hnam nunphung thurochhiah pawimawh tak, Mizote min ti Mizo lehzualtu a ni tih hre thar ang u,” a ti.
Buangi (Lalneihsangi) hian kumin April 14 khan kum 108 a tling a, kum 109 a hmang mek. Amah hi Aizawl Venghnuaia piang leh seilian niin, an chhungkua hi Salvation Army zawm hmasate zing ami an ni. A pa chu Thangchhunga, CSM Mizorama corps sergeant major (kohhran upa) hmasa ber a ni. Buangi hi Mizo zinga rehab-a thawk hmasa zing ami niin, Behala Girls Home Kolkata-a hmeichhe rahbi tleu leh fahrahte enkawlna hmunah a thawk tawh thin. Kum 2022 khan Heritage Award buatsaih ‘Mizo Hmeichhe Chhuanawm’ (Women of Substance) hlan a lo ni tawh ni.
Upa berah Buangi puang
