Deen Dayal Antyodaya Yojana – National Urban Livelihood Mission (DAY-NULM) hnuaia khawpui chhunga chenna/ innghahna mumal neilote tana hmalakna, Shelter for Urban Homeless (SUH) kaltlanga hmalakna viltu City Level Executive Committee Champhai chuan an chairman, district bawrhsap James Lalrinchhana hoin Nilaini khan New Champhaia kum upate tlukluhna leh enkawlna in, Shelter for Senior Citizens sak mek chu an tlawh.
District bawrhsap chuan district hmasawn nana hmasawnna ruhrel siamte a puitlin theih nana ngaihven a tul tih sawiin, hna tha leh tlo, ram leh hnam tana rotling, mipui tana chhawrnahawm tak din a nih theih nan hnathawh kal mekte enfiah thin a tul tih a sawi. Kum upate hmakhua ngaiin sawrkarin theihtawp chhuaha hma a lak thin thu sawiin, kum upate tlukluhna leh enkawlna tur satute chu neitu thinlung pua theihtawp chhuah turin a chah.
Kum upate tlukluhna leh enkawlna hmun Shelter for Senior Citizens New Champhaia sak mek hi Rs. 35,32,000 senna tur niin, 2022 June 2 khan sak tan a ni a. First installment Rs. 1,76,600 leh second installment Rs. 14,12,800 pek tawh niin, tunah hian third installment Rs. 14,12,800 dil mek a ni a, hemi hnu hian fourth installment Rs. 5,29,800 dil leh tur a ni ang.
Bawrhsap hian New Champhaia Genesaret Gospel Home for Senior Citizens leh Genesaret Gospel Home for Children’s Home-a tlawh nghal a, thawktute leh Home-a awmte a kawm a ni.
Upate awmna tur in sak enfiah
![](https://theaizawlpost.org/wp-content/uploads/2023/02/upa-1024x575.jpg)