Chhungkua, khawtlang, ram leh hnam tana ke an lo pen tawhnaah kum upate zahna chibai a buk tih Social Welfare minister Er Lalrinawma chuan a sawi.
Mizoram Upa Pawl Aizawl West-III in an conference vawi-12 na Thawhtannia an neih a hmanpuinaah Er Lalrinawma chuan kum upate ram leh hnam tana an hlutna sawiin, kum 60 chunglam chuan chhungkua, khawtlang, ram leh hnam tan theihtawpin ke an lo pen tawh thin a, chutianga hna an lo thawh tawhnaah chuan a tharin zahna chibai a buk tih a sawi.
Hmanlai hun atangin Mizote chu upate thu leh hla zawm thin leh rorelnaah pawh mawhphurhna pawimawh tak chelhtir thin kan ni, tiin, “Tun hun thlengin hetiang dinhmun upaten in la chelh zel thei hi a lawmawm a, in thiamna leh hriatna chu thangtharte tana hlanchhawnga finchhuah zel turin ka sawm che u a ni,” a ti.
Kum upa thluak nem chu sawrkar leh ram pawhin a thatpui thin tih minister hian a sawi a. ‘Midangte tana malsawmna nih’ thupuia neitu an nih angin, hemi hlenchhuahna kawngah theihtawp chhuah zel tura sawmin, “Thalaite leh kum naupang zawk ruihhlo bawiha tangte chhanchhuahna kawngah hian upaten kan tu leh fate hnenah ruihhlo that loh zia hrilh tam a tul a; kan hnam ziarang leh nunphung ngaihhlut a tul zia te, mahni hnam ziarang ngaihpawimawh kawngah tan lak a pawimawh a ni,” a ti.
MUP Aizawl West-III Area-ah hian branch 7 awmin, member 1757 an awm a ni.
Upate zahna chibai ka buk – Social Welfare minister
![](https://theaizawlpost.org/wp-content/uploads/tap_logo-min-large.jpg)