Jupiter zirchiang tur thla lem kapchhuak
NASA chuan thawhtanni khan Kennedy Space Center, Florida, USA atangin thla lem Europa Clipper an tih chu an kapchhuak.
A zinkawng a zawh tluang thei a nih chuan he thla lem hian Jupiter a tum hunah nunna a awm thei dawn em tih a zirchiang dawn a, tui, chakna leh mihring mamawh thil tinreng awm dan a zirchiang dawn tih NASA chuan an sawi.
He mission hi $5.2 billion senga ruahman niin, hmun vawtah pawh a hna thulh thei lo tura ruahman leh ngaih a ni.
A rih zawng hi pound 12,500 chuang a ni a, feet 100 a sei leh ft. 58 a zau niin, a chhungah hian zirchianna hmanrua chi hrang hrang, changkang leh tha ber ber dah a ni bawk.
An ruahman dan chuan kar hmasa lam khan he Europa Clipper hi thawnchhuah tum a ni tawh a, mah se an kahchhuahna tur hmunpui lamah hurricane milton vanga chhiatna nasa tak a thlen avangin an sawn thu NASA chuan an sawi.
Europa thawnchhuah tak hian a zinkawngah paltlang tur hlauhawm hrang hrang a ngah hle a, heng zawng zawng laka him thei tura duan a nih thu NASA chuan sawi mah se, engmah sawilawk theih a nih loh thu an sawi tel a, Jupiter pawh hi a thleng thei ngei dawn em tih hriat ni lo mah se, a han tum fuh chat theih nan theihtawp an chhuahzui nghal thu an sawi bawk.