By James Miahlung
Tunhnai chhoah All India level hna sang exam-ah Mizoram atanga candidate-te hming a lang thei ta mang lo. Hei vang hian UPSC result chhuah apiangin print/online media lamah a chhan ni awm hrang hrang ni thei awma ngaih zingah State Service Officer dinhmun that vang anga ngaihna nena kan Officer te chirhthehna tawngkam chi hrang hrang hmuh tur a tam chho ta hle.
Mi tam takin tun hnai kum 10 vel chhunga UPSC-ah Mizote tlin theih loh chhan chu State Service Officer te dinhmun that vang leh, an nuamsa lutuk avanga thalaiten UPSC Exam han buaipui lam aiin MPSC Exam beih a, State Service Officer nih an awn zawk vang niin an ngai a. He thil hi sawi tlawr thiam taka an sawi kual thin an tam avangin Mizoram mipui tam tak a hmin nia ngaih theih turin mi vengva deuh leh lekha thiam pangngnai tura ngaih te pawhin state service (MCS, MPS, MF&AS, MIS, etc.) te dinhmun tihhniam a tul thu te, recruitment thlengin tihtlem a tul thu an rawt hial a ni. Hei hi thil mak tak mai, thil hriatchian loh vang liau liau niin a lang a. Mipuite hrilhfiah leh a nihna dik tak tarlan pawh a tul hle a ni. State Service-vs-All India/Central Service
Mizorama State Service ten hamthatna an dawng nasa hle anga sawi leh, All India Service emaw, Central Service te pawh awt bik lo leh, Service kalphung leh nihlawhna pawh inang deuh reng ang hiala sawi an awm thin a. Hei hi a dik tawk lo hle a ni. Mizoram-a State Service te Grade hrang hrang leh Central Service te nih dan phung tlangpui angin han khaikhin chhin ila, hetiang hian – (Table en la)
Mizoram Sorkarah hian Pay Scale sang ber chu Level-14 a ni a, chu aia sang a kaisan theih loh. Hetih lai hian All India Service leh Central Service te chuan Pay Level-14 chung lamah Pay Level-15 (Principal Secretary Level) te, Pay Level-16 (HAG+) te mai bakah, Pay Level-17 (Apex Scale) te an nei vek a ni. Chutiang ang Pay Structure nei te chu Mizoram State-a State Service te nena han khaikhin chi rual a ni lovang tih a lang chiang awm e.
Tin, Mizoram Sorkarah chuan Service tlem te ten Grade thenkhat atanga time-bound promotion an nei tih lohvah chuan, Service nawlpui hian promotion reng reng hi Qualifying Service neih hnuah pawh post ruak a awm zel loh chuan kaisan theih loh a ni tlangpui a. Hetih lai hian All India Service leh Central Service-ah te chuan Level-13 thleng hi chu time-bound promotion angin an kal tlangpui a. All India Service-ah phei chuan kum 4, kum 9 leh kum 13 ah te Senior Grade, JAG leh Selection Grade-ah te an kaisang thin a. Tin, Grade sang zawkah te pawh hian time-bound promotion ang maiin an kaisang thei thin a ni. Hetiang anga Service kal thei hi State Sorkarah hian an awm lem lo tih chu a hmuh theih vek a ni.
MCS leh State danga State Civil Service te dinhmun India ram inrelbawlna (Administrative system) ah service chi thum pawimawh deuh deuh-All India Service(AIS), central service leh state service-an awm. State service te hi state administration-ah a fawngvuantu niin block leh district atanga state level thlengin post pawimawh tak tak chelh tura duan an ni. MCS te Sorkarin vulh lian viau anga sawi a awm thin nain India ram State danga State Civil Service te nen an dinhmun khaikhin chuan State danga Civil Service te an phak lohna lai sawi tur a awm nual zawk. Entirnan, MCS senior grade officer post thenkhat SDO/SDM, Election Officer, Assistant Commissioner te chu state dang civil service tan luhtir a chelh theih (Entry grade post) an ni ve thung. Chumai bakah Mizoramah chuan departmental officer in director level post an ngah avangin state danga IAS emaw, State Service te chelh ang chi MCS in an chelh ve lo a awm nual zawk a ni.
Mi thenkhatin “MCS te an kaisang chak lutuk, post an chuh chak si” te an ti thin. Hei hi hriat fuh tawk loh vang a ni bawk. State dang tam zawkah State Civil Service ten post an ngah avangin an career progression/promotion a chhe lutuk ngai lo. MCS kaisang chak bik anga lang pawh hi a chhan pakhatah chuan tunhmain regular taka lak a nih lo vang a ni. Kum 1997-ah MPSC in a vawikhat nan MCS a la a, hemi hnu hian reh vang vangin 2002, 2003 leh 2007 ah lak a ni leh a. Kum 2010 atangin kum tin deuh thawh lak a ni ta chauh a ni. Pension leh IAS a kaisang an awm ve zel a, a hmaa recruitment a awm mumal si lo chuan Officer-te tan kaisanna chance a lo tha ta niin a lang a, hei hi nakin lamah chuan MCS nawlpui tan kaisanna kawngah harsatna siamtu a ni ve thei bawk a ni. Tin, a hranpain MCS ten post an chuh vak vak ngai lo va, deputation-a kal theihnaah leh IAS indaihlohna avanga post luah tur remchang a awmin Sorkar-in tul a tih chuan MCS te a dah a ni zawk. Tin, Civil Service te chelh ngei tur anga ngaih post te, State danga an State Civil Service te an chelh tir thin te hi Mizoramah chuan Service hrang hrangin an chuh ve deuh hlawm zel thin a. Chu chuan IAS/MCS te chelh ngei tur post te Sorkarin an cadre post-ah a dah hian post chuh vak anga puh ching an awm ni zawkin a lang.
State Sorkar-a post pawimawh ber pawl, Secretary post chungchangah pawh Northeast State dang—Assam, Nagaland leh Sikkim a State Civil Service te nena khaihkhin chuan Secretary post 4 nei mek MCS te dinhmun a tha fal bik chuang hauh lo. An state Personnel Department website atanga a lan dan in, Assam Civil Service(ACS) in Commissioner post 2 bakah Secretary post 30 vel an nei a, Nagaland Civil Service(NCS) in Commissioner post 2 leh Secretary post 13 vel nei in Sikkim Civil Service-in Secretary post 13 vel an nei ve bawk.
Northeast (NE)-a State Service Officer ten post pawimawh an luah theih chhan hi a bul berah chuan AIS officer indaih lohna vang a ni ve. NE region hi mainland India atanga AIS tling tharten an awm chak lohna ber pawl niin, rei lo te an service hnuah inter-cadre deputation emaw inter cadre transfer hmanga NE atanga mainland India lama kalchhuah tum officer an thahnem em em thin. AIS officer an indaih chuan si loh chuan State Sorkar te tan post pawimawh-DC, SP, Director, Secretary, etc.-te chu state service/departmental officer te a chelhtir lo thei lo a ni. Hei vang hian NE state tam zawkah chuan DC leh SP post te chu IAS/IPS cadre post ni mahse State Service mi leh sa ten an luah thup reng thin a ni zawk. State Civil Service te an nuamsa bik lo
State Service Officer te, a bik takin, MCS te nuamsa viau tur leh State Sorkarin duhsak uchuak anga sawina a awm thin a. Hei hi thil belhchian dawl lo a ni tih hriat a tul bawk. State Civil Service ten hlawh leh thil dangah hamthatna an dawn te hi han sawi viau tham a tling chuang lo. MCS te tan Mizoram Sorkarin Pay Structure hrang a siam lo va, Mizoram Pay Structure-ah Grade hrang hrang angin ruahman sak an ni a. State Sorkar hnathawk dangte hlawh ang zat tho an hlawh a, Special compensatory allowances (SCA) tih loh, special allowances emaw incentives dang dawn an nei lo. SCA hi State Sorkar hnuaia thawkten pay level a zirin rate in angin an la a, midangte nen an lak zat a inang reng. Mi tam takin MCS officer nawlpuite dinhmun hmuh kanin senior officer (DC, Director leh adt) leh thingtlang field posting (BDO, PD, etc.) chelh ten facilities leh hamthatna dang an dawn chauh an thlir thin niin a lang. MCS officer zingah motor kawl loh avanga sumo emaw mahni private motor a zin ve thin te, Sorkar Quarters indaih loh avanga mi inluah khawsa ve nawk nawk te, thla tin hlawh atanga housing loan leh personal loan rulh ngai avanga indaih loh ve tak tak an tam ve tho tih hriat a tha. Khawsak hautak zelah State Service Officer tan mahni hlawh chauh rin chuan nuamsa lutukin a awm theih lo ti ila kan sawi sual lo ang.
State Service te dahhniam tumna
Mi thenkhatin All India/central service leh state service inthlauhzia an sawi ve chamchi. IAS, IPS leh Central Service dangte hi exam harsa berah ngaih UPSC kaltlanga lut an ni a, an ngaihsanawm teh meuh mai. Chutih rualin, competitive exam harsa ve tak state PSC kaltlanga lut ve tho State Service te dahhniam emaw sawi hnawm phet tum erawh a tul ber lo. Anmahni zawnah pawimawhna an nei theuh a. State Service te puina tel lovin AIS Officer ten anmahni chauhin hna an thawk theih bik chuang lo tih hriat tel a pawimawh a ni.
India ram State hrang hrangah a service-in a ken tel mawhphurhna avangin state service te dinhmun a chhe hran ngai lo. A nihna takah chuan mipui rawngbawlna (public service) ah Central Service (Accounts, Audit, Revenue, Railways, etc.) te aiin State Service ten mipui tan hna an thawk thei zawk ti ila a sual lo mai thei. Hei vang hian UPSC tling, IAS/IPS chang si lo, State Service thlang zawk sawi tur an awm ve thin reng a ni. Training leh exposure chungchangah All India/Central Service leh State Service inthlauhzia sawichhuah a ni thin a, a dikna chen pawh a awm ang. Amaherawhchu, tunhnaiah state service te training nasa taka tihchangtlun niin DoPT hmalakna zarah AIS/central service te angin foreign training thlengin state service ten an chhim pha ve tawh a. MCS officer zingah training-na hmun tha LBSNAA, IIM leh a danga training kal an awm ve nual tawh bawk.
State Service Officer te hi State Sorkara tawp turah ngaih tur an ni chiah lo a, IAS/IPS/IFoS-a an kaisan hnuin an duh phawt chuan Central Staffing Scheme (CSS) kal tlangin Central Sorkar-ah an thawk ve thei a ni. CSS kaltlang kher lo pawhin Central Ministry/ Organisation/subordinate office hrang hrangah State Service tan deputation a kal theihna kawng a awm ve zeuh zeuh bawk. Tunah hian hnam dang promotee IAS officer thenkhat Central Ministry-ah thawk lai mek sawi tur an awm ve reng bawk a ni. Indem mai lovin UPSC result-ah Mizo hming a lan khat avanga khawtlang, kohhran leh sawrkar dem hian kawng ro a su lem lo va. State Service te pawngpaw demin awmzia a nei hek lo. A inbuatsaih meka te tan la sauh sauh tura infuih leh nakina hetiang kawnga kal tum te tana kaihhruaina tha (guidance) pek hi UPSC-a tling kan nei theihna tur kawng awmchhun chu a ni.
UPSC EXAM LEH MIZORAM STATE SERVICE (UPSC Exam chungchanga thu belhchian dawl lo sawi zauna)
