Mizoram chhimlam district pathuma kuthnathawktute tharchhuah Mizo hmarchate (Bird’s Eye Chilli) chu a vawikhatna atan USA-a Nevada state-ah thawn a ni dawn a, Thawhlehni khan Agriculture minister C Lalrinsanga chuan Haulawng atangin a vailiam.
Hei hi International Competence Centre for Organic Agriculture (ICCOA) leh Agriculture department hnuaia Mission Organic Mizoram (MOM) tangdun buaipui niin, Mission Organic Value Chain Development for North Eastern Region hnuaia hmalakna a ni.
Mizo hmarchate thawnchhuah tur hi Lunglei, Siaha leh Lawngtlai district-a farmer producer company (FPC) 12 hnuaia kuthna-thawktute thar a ni a. Metric ton 7.5 (kg. 7500) thawn chhuah phawt a ni. Khawvelin inang tlanga a hman mek hmarcha thak dan tehkhawng, Scoville Heat Unit (SHU) ah tuna thawnchhuah Mizo hmarchate hi SHU 140000 a ni. Hmarcha thak dan hi SHU 500 atanga teh tan deuh niin, a thak ber chi ho chu SHU maktaduai 1.5 chunglam te a ni.
ICCOA hotute sawi danin, Bird’s Eye Chilli thawn chhuah tur organic a nih leh nih loh te endikin, sample hi uluk taka test hrang hrang paltlang a ni a. Bengaluru-ah test phawt niin, Nevada USA ah final test tih a ni. Endiknaah hian chemical engmah an hmu lo a, Organic Standards Protocol test a paltlang a ni.
Mizoram sawhthing leh aieng pawh demand a sang tih a sawi a, state dang leh ram pawnah thawnchhuak thei turin FPC-te nen hma lak tlan zel an tum tih a sawi.
Agriculture minister chuan thawnchhuah tur Mizo hmarchate hi ‘patent’ a nih tawh avangin ram dangah anmahni ram tharchhuah anga lo chin ve ngawt theih a ni tawh lo tih a sawi. Mizo kuthnathawktute tharchhuah ngei US market a thleng tur chu a lawmawm a tih thu sawiin, ICCOA, MOM leh FPC te thawrimna leh inpekna rah a nih thu a sawi. “Kan thlai thar hi organic a nih chuan ram changkang apiangin an duh em em a, helamah hian ke kan pen nasat a tul hle,” a ti.
US-a thawn tur hmarchate phurtu lirthei hian Visakhapatnam, Andhra Pradesh thleng phurin hemi atang hian USA ah thawn a ni dawn a ni. Sus Agri Development Pvt Ltd, Bengaluru Karnataka nen tangduna thawnchhuah tur a ni.
US-ah Mizo hmarchate thawnchhuak
