US-ah Taylor Swift a la lar ber
Taylor Swift chu kar khat chhunga US-a zaithiam lar ber a la ni a, Billboard Artist 100 chart-ah a No.1 a, he chart-a a No.1 tawh zawng zawng chu kar 74 a tling tawh a, No.1 ni ngun ber a nihna a sawh nghet leh sauh e. Hetihrual hian Jason Aldean leh Jung Kook te pawh top 10-ah an lang.
Billboard Artist 100 chart hi kar khat chhunga US-a zaithiam lar dan tehna niin, chart ranking siam nan hian kar khat chhunga an album leh hla hralh tam dan te, streaming leh radio airplay te chu tehna pawimawh a ni.
Taylor Swift hian a album a hralh tha hle a, ‘Speak Now (Taylor’s Version)’ chu 1,21,000 hralh lehin Billboard 200 (albums) chart-ah a kar hnih nan a No.1 a, a album dang ‘Midnights’ chu he chart-ah hian No.5 niin, ‘Lover’ chu No.7 a ni a, ‘Folklore’ chu No.10-a ni bawk. Top 10 pawn lamah a album dang pasarih langin, Billboard 200 chart-ah tum khatah album 11 a lanpui thawt thei a, hmeichhe zaithiam zingah hetiang tithei awm chhun a la ni a, group leh mipa-ah pawh The Beatles leh Prince te chiah hetiang tithei hi an la awm.
Billboard Hot 100 (singles) chart lamah pawh a che tha hle a, a hla ‘Cruel Summer’ chu No.8 niin, ‘Karma’ featuring Ice Spice chu No.11 a ni a, ‘Anti-Hero’ (No.19), ‘I Can See You (Taylor’s Version)’ (No.33), ‘Enchanted (Taylor’s Version)’ (No.65), ‘Back to December (Taylor’s Version)’ (No.76), ‘Mine (Taylor’s Version)’ (No.81) leh ‘Spark Fly (Taylor’s Version)’ (No.95) te an lang thei a ni.
Country star Jason Aldean chu No.100 atangin No.3-ah a invawrh a, ani pawh hian a hla thar ‘Try That in a Small Town’ hralh that zar a zo a ni. He hla hi Billboard Hot 100 chart-ah No.2 niin, he chart-a a thlen san ber a la ni. He hla music video hi CMT-in ni thum an tihchhuah hnuah an chhuah chhunzawm duh ta lo va, hei hian a vawrh lar ta zawk mah a, kar khat chhungin stream maktaduai 11.6 leh download sales 2,28,000 a nei thei a, a sales hi 2013 hnuah country hlaah chuan kar khat chhung tha ber a la ni.
BTS member Jung Kook chu No.5 niin, ani hian a hla thar ‘Seven’ featuring Latto a tichhuak a, he hla hi Hot 100 chart-ah No.1 niin, BTS member zingah Jimin ‘Like Crazy’ dawta solo artist anga he chart-a No.1 kai thei pahnihna a ni. Heti hian Jung Kook hi BTS member zingah Artist 100 chart-a solo artist anga chart top 10-a lang thei parukna niin, Jimin (No.1), Suga (No.3), RM (No.6), J-Hope (No.9) leh Jin (No.10) te an lo lang tawh bawk a ni.
US-ah Taylor Swift a la lar ber
