Congress kalkanin Biden administration Israel hnenah tank ammunition 14,000 round vel $106 million man hu vel zet chu Gaza Strip-a inbeihna sosan laiin a hralh.
Hetih lai hian President Joe Biden-an Ukraine, Israel-te tana tanpuina $ 106 billion aid package chu Congress-ah a tang mek thung a.
State Department chuan tank ammunition hralh a nih thu hi Congress pawh hriattir a ni tawh tiin a sawi a. Secretary of State Antony Blinken chuan US national security interest vangin heng tank ammunition te hi hralh ngai a ni a ti.
Hei vang hian foreign military sale dawna congressional review ngei ngai chu kalkanin a awm tihna a ni a. Hetianga ruahmanna hi thil thleng zen zen lo a ni bawk.
“United States chuan Israel security a ngai pawimawh a, US national interest tana pawimawh niin Israel-in self-defence capability a neih a ngai a ni. Tuna hralh pawh hi thil tum tihhlawhtlinna a ni. Hengte hi Israel chuan a chhehvela thil hlauhawm te beih nan leh homeland defense atan a hmang dawn a ni,” tiin tarlan a ni a.
Israel hnena tank ammunition a hralh zingah hian 13,981 120 mm High Explosive Anti-Tank Multi-Purpose leh Tracer tank cartridges bakah US support, engineering leh legostics te pawh a tel a ni.
Arms sales a Congress kalkan hi thil thleng zen zen lo niin lawmaker te chuan tun hmaa kalpui a nih pawhin an dodal nasa hle thin a. A tlangpuiin ngaihtuahna hun siam thin a ni.
May 2019 pawh khan khatih laia Secretary of State Mike Pompeo chuan Saudi Arabia, UAE leh Jordan te hnenah ralthuam $ 8.1 billion man hu a lo lei tir tawh a, Saudi-UAE kaihhruaia Yemen indona thilah a ni a, Congress paltlang zo dawna a lan loha vangin Trump administration khan an lo tilui tawh bawk a ni.
Khatih lai khan Pompeo chu nasa taka sawiselin a awm a, a chhan chu ralthuam tam tak hralh tumte chu la siam tur chauh a nih vang a ni bawk a. Mahse, internal investigation tih hnuah a fihlim ta thung.
Hetianga hmalakna hi US President pali velin kum 1979 atang khan an lo kalpui tawh a. President George H.W. Bush administration pawh khan Gulf War lai khan Saudi Arabia ralthuam rang taka pek nan an lo hmang tawh a ni.
US Congress kalkanin Ukraine ralthuam pe
