US consul general-in CM
leh CYMA hruaitute kawm
US Consulate General Kolkata-a consul general Kathy Giles Diaz chuan Mizoram a rawn tlawh a. Chief minister Lalduhoma a kawm bakah Central YMA hruaitute a kawm.
Ningani tlaia chief minister nen an inkawmnaah consul general chuan, United States-ah Mizo hnahthlak tam tak an awm a, an awmna hmunah khua leh tui tha an ni zel a. Chutianga inzawmna tha tak nei an nih avang chuan Mizoram tlawh a chak zual tih a sawi. Mizoramah US company tana investment kalpui theihna chi a awm a nih chuan a tul anga tanpui a inhuam tih a sawi bawk.
Chief minister hian investment lama Mizoram tanpui a inhuamnaah lawmthu hrilhin, foreign funding hmalakna lam chi reng reng chu India sawrkar remtihna hnuaia kalpui vek a ni a. Mizo hnahthlak US-a cheng an tam tawh avangin Mizoram mipui zingah US tlawh duh an tam tial tial a, inpawh taka thawhho a tul tih a sawi a ni.
US consul general Kathy Hiles Diaz hian Zirtawpni khan Central YMA hruaitute a kawm a. Central YMA president Lalhmachhuana chuan YMA ngaipawimawha a rawn tlawh chu lawmawm a tih thu sawiin, YMA leh Consul office-in thawh dunna tha tak an nei a, hun hmasa lamah consul general lo ni tawh leh ambassador-te pawhin CYMA hruaitute kawmin an office an tlawh tawh thin tih a sawi. Consul general chu India ram a awm chhunga Mizoram lo tlawh leh a, India- Myanmar ramri tlawh ve turin a sawm tih a sawi bawk.
Central YMA hruaitute hian Mizo thalaite tana engemaw tal ruahmanna siamsak dan kawng zawnsak turin Kathy Giles Diaz hi an ngen a. YMA-in raltlan a lo buaipui dan an sawipui a ni.
CYMA general secretary Prof Malsawmliana’n YMA chanchin leh hma an lak dan a sawizau a. US palaiten YMA chungchanga an hriat duh hrang hrang a hrilhfiah bawk.
US consul general-in CM leh CYMA hruaitute kawm
