US President Joe Biden leh top Republican Kevin McCarthy te chuan inbiakna an neih hnuah US leiba leh sum puk theih chin bituk tihsan chungchangah inremna an siam thei ngei tura ngaih a ni.
“Inremna kan siam theih ngei ka ring,” tiin House Speaker McCarthy chuan a sawi a. Inremna an siam theihlohna lai pawh a awm thu sawiin Biden chuan, “Mahse, deafult chu kan pumpelh ngei a beiseiawm e,” tiin a sawi.
Inremna siam a nih loh chuan US Treasury Secretary Janet Yellen chuan 1 June-ah chuan US chu a default hman tawh dawn tiin a sawi tawh a ni.
Leiba neih theih chin ‘debt ceiling’ hi Congress-in a siam niin US sorkarin leiba leh sum a puk theih chin a bituk thin a.
US chuan hei hi tihsan a mamawh mek a, tihsan remtihlohna a awm a nih chuan US chu leiba pe thei lovin 1 June atang chuan a awm dawn a. Chumi awmzia chu a bill pek nan sum a puk thei dawn tawh lo va, a hnuaia hnathawkte hlawh pawh a pe thei dawn lo va, chu mai chu ni lovin na takin khawvel economy a nghawng ngei dawn bawk a ni.
US debt chungchanga harsatna chinfel a nih theih nan hian President Joe Biden chuan Tokyo a G7 meeting pawh a hun hmaa kalsanin a thlawk haw hial a.
Republicans leh Democrats te chu leiba bituk siam chungchangah hian an inrem mai thei lo va, House of Representatives thununtu chu Republican an nih bawk si avangin an remtihna tel lo chuan kalpui zui theih ngaihna a awm lo a ni.
“Inremna kan la siam lo” tiin McCarthy chuana sawi a, “Mahse, sawihona tha takin kan nei a, ngaihdan inang lote pawh tha takin kan sawiho a ni,” tiin a sawi bawk a. “Inremna kan siam theih hma chuan Biden nen ni tin sawi dunna kan nei ang,” tiin McCarthy chuan a sawi bawk.
McCarthy chuan Republicans leh Democarts tena inremna an neih theihlohna chhan chu tun hma atang tawhin sum hman danah zel a la ni a ti a. Tunah erawh tlemin an ngaihdan inmil lote a na lutuk ta lo a ti bawk.
Thawhtanni khan Treasury Secretary Janet Yellen chuan Congress hnenah lehkha thawnin leiba neih theih chin tihsan a nih loh chuan 1 June atangin bill pek theih a ni tawh dawn lo tiin a hrilh a ni.
“Congress-in leiba neih theih chin a tisang lo a nih chuan American family tam takin harsatna namen lo an tawk dawn a ni,” tiin Yellen chuan a sawi.
US debt ceiling-ah inremna awm theih beisei
![](https://theaizawlpost.org/wp-content/uploads/2023/05/us-1.jpg)