US hmarchhak ruah sur nasaah mi pahnih thi

US hmarchhak ruah sur nasaah mi pahnih thi
US hmarchhakah Thawhtanni zan atanga Thawhlehni thlenga ruah tam tak sur avanga sabereka khuangkaih thlengah New Jersey-ah mi pahnih an thi a. Hmun tam takah tui a lian a, veivahna tibuaiin chhanchhuah ngai tam tak an awm.
Tual chhung thuneitute chuan thite hi Plainfield, New Jersey-a tui lianin an chuanna lirthei laa luia a luhpuite an nih thu an sawi a. Tuiin kawngpui a chim thut avanga lirtheia tang mi 21 chhanchhuah an ni bawk.
New York City-ah pawh tlai lun lai takin kawtthler leh lei hnuai rel station-ah tui a tling nasa hle a. Video thehdarhah chuan lei hnuai luhna chhukah tui a luang a, rel nghahna zawlah pawh a tling nasa hle tih a lang a. Manhattan station pakhatah phei chuan rei vak lo rel chhungah a chuang an tang nghe nghe.
Thawhtanni khan US puma hmun 200 chuangah tui a lian a, a tam ber hi New York, New Jersey leh Pennsylvania-ah a ni.
Lancaster County, Pennsylvania-ah-ah chuan darkar nga pawh tling lo chhungin ruah inches sarih chuang a sur hman a, chhiatna athleng tih puan nghal niin mi 16 vel tui atanga chhanchhuah an ni.
National Weather Service chuan tun kar chhung hian ruah a la sur chhunzawm dawn tih an sawi a. Lirtheia chuang zingah thi an tam thin avangin khalhtute chu ruah sur leh tui lian thei lakah fimkhur lehzual tura ngen an ni.
Tun hnai lawkah khan Texas-ah ruah sur nasa tak avanga sabereka khuangkaih leh tui lianah mi 130 chuang an lo thi tawh a, sik leh sa inthlak nasa avanga khaw awm dan uchuak tak tak pung tura sawi lawk thlen diknaah ngaih a ni.
“Sik leh sa avanga thleng thei tam tak karah kan khawsa mek a, hemi do let hneh tura kan inbuatsaih leh inrin a ngai a ni,” tiin New York City mayor nih tuma in-candidate mek, Zohran Mamdani chuan a sawi.