US-in a beih chuan Iran-in chhan let ve nghalah vau let

US-in a beih chuan Iran-in chhan let ve nghalah vau let
Sorkarin khap beh tuma na taka a nawrna chu lungawi lohna lantirtu mipuite chuan an palzut zel a, hetih lai hian US-in beihna a bei a nih phawt chuan an chhan let ngei tur thu Iranian sorkar chuan a sawi.
Video thar darh leh thil thleng hmutute sawi dan chuan sorkar hi lungawi loh lantirtute na zawka hmachhawn tura an inbuatsaih zel tih a lang a. Irana province tinah lungawi loh lantirhna hi a darh tawh.
Damdawi in pahnih chuan ni hnih lek chhungin thi mi 100 chuang ruang an dawn tawh thu leh ram puma thi zat phei chu a tam hle an rin thu an sawi.
US chuan Iran hi ‘mipuite an that a nih chuan na takin kan chhu dawn’ tiin a lo vau tawh a. Hei hi Iranian parliament speaker chuan chhangin US-in a bei a nih vaih chuan an chhehvela Israel leh US sipai leh lawng hmunte chu an bitum ve nghal tur thu a sawi.
An khawpui, Tehran-a lungawi loh lantirtute chuan Puithiam ro relna, Supreme Leader Ayatollah Ali Khamenei-a thuhnuaia awm an duh tawh lo tih an sawi.
Iran-a attorney general chuan hetianga telte hi ‘Pathian hmelma’ tia an chhiar dawn thu a sawi a, hetianga an tihte hi chu thi tura hrem theih an ni a. Khamenei-a chuan mipuite hi ‘Trump-a khawihngaihna dil’ mai an nih thu a sawi thung.
Trump-a chuan Inrinni khan Iran-in ‘ZALENNA’ a zawng’ a nih chuan US chu ‘pui turin a inpeih reng’ tih a sawi leh.
Iranian President Masoud Pezeshkian-a chuan an buai chhanah US leh Israel a puh a. “Ram chung leh pawnah mi an zirtir (train) a, pawn atangin kan ramah mi firfiak an tir lut a, mosque an hal a, bazar an bei a, Rasht-ah buaina an chawk chhuak,” a ti a, a finfiahna erawh a sawi lo.
Mihring dikna chanvo humhalhtu pawlte chuan thi leh hliam zat chu an chhinchhiah aia tam daih a nih an ring.
Video darhah chuan venhim hna thawktuten Tehran, Kermanshah province khawthlang leh Bushehr region chhim lama pungkhawmte an kap lai a lang.
Video dangah pawh kartawp khan khawthlang lam, Ilam-ah mipui pun khawmna hmun, Imam Khomeini Hospital lam hawia silai an hmet puak lai a lang bawk.
Damdawi in tam tak chuan thi leh hliam buaipui ngai an ngah lutuk avangin an indaih lo tih an sawi a. Zirtawpni zan pawh khan Rasht khawpuia damdawi inah chuan ruang 70 dah luh niin Tehran damdawi inah pawh mi 38 vel thi an awm nia sawi a ni.
Police chief chuan Inrinni zan khan sorkar TV-ah lungawi loh lantirtute hmet mit tura nasa zawka an inbuatsaih thu leh ‘mi pawimawh tak tak’ an man thu a sawi.
December 28 atanga lungawi loh lantirnaah hian mi 2,500 chuang man an ni tawh niin mihring dikna chanvo humhalhtuten an sawi.
Ram dang chanchinbute chuan a hmun atangin engmah hriat theih an nei lo va, Iranian sorkarin Inrinni atang khan internet an titawp bawk a, thil thleng tak tak hi hriat a har hle.
Video darhah chuan khawpui lian ber pahnihna, Mashhad-ah venhim hna thawktute leh mipuiin an innawr nasa hle a. Hmai tuama lungawi loh lantirtute chu bawlhhlawh bawm leh thil dang phena awmin an hma hla deuh takah venhim hna thawktute an awm thung a, bus a kang hluah hluah a, sipai ri pawh hriat tur a awm.
Tehran-ah pawh Inrinni zan khan mipuite hi Gisha district-a kawtthlerah an pung khawm a. Punak Square-ah bel an vaw ri nasa hle a, Heravi district-a kawngzawhnaah puithiam rorelna tihtawp an duh thu an aupui bawk.
Inrinni khan Trump-a chuan social media-ah Iran-in zalenna a duh chuan puih an inpeih tih a tar lang a. New York Times leh Wall Street Journal (WSJ) chuan che chhuak turin inrawn pawh a ni tawh niin an tar lang a; mahse, WSJ chuan Iran kah mai erawh a rinawm rih lo niin a tar lang.
US-a Human Rights Activists in Iran chuan chawlhkar hnih liam ta chhungin mi 162 vel leh venhim hna thawktu 41 thah an ni tawh niin a sawi a. Norway-a Iran Human Rights chuan mi 192 vel thah an ni tawh tih an sawi ve thung.
Tun tuma Iranian-te lungawi lohna an lantir hi kum 2022-a Kurdish nula Mahsa Amini-i thah a nih hnuah a nasa ber a ni a. Kha mi tum khan mi 550 chuang thiin mi 20,000 chuang man an ni bawk tih mihring dikna chanvo humhalhtuten an sawi.