US-in an ram enthlaa an puh Chinese pahnih man
Chinese pahnih chu ram enthlak hna thawka puh avang leh US Navy-a tangte hnen atanga thu ruk pawimawh hai chhuah tuma beia puhin US-ah man an ni tih Thawhlehni khan US Justice Department-in a puang.
Kum 38 mi, Yuance Chen leh kum 39 mi, Liren Lai te hi Chinese sorkar mi tirha puha man niin thiam loh an chang a nih chuan kum 10 thleng lung in tang thei an ni tih department chuan a sawi.
Chen-a hi Happy Valley, Oregon-a cheng niin Lai hi April thlaa tourist visa hmanga Houston, Texas-a lut a ni a. Zirtawpni khan FBI-in an man a ni.
An laka thubuai ziah luhah chuan Chen leh Lai hian China-a Ministry of State Security hnuaiah United States-ah hian thil tih ruk leh thu ruk hriat theihna tur kawngin an che nasa hle tih tar lan a ni.
An chet dan zingah hian sum hmangin ram thil himna kaihhnawih thilte an lei a, US Navy-a tang lai sipaite chu kawm kualin an hnen atangin thu ruk hriat tumin an bei nasa bawk nia tar lan a ni.
“An chet dan hian Chinese sorkarin kan sipaite-ah hma laa thu ruk hriat tum leh kan ram chhung ngeia kan himna thlithlaiin an che tih a tilang a ni,” tiin Attorney General Pamela Bondi-i chuan a sawi.
Thubuai ziah luhah chuan Lai-a hian US-a dan ang thlapa cheng nghet sa, Chen-a hi a chhawr a. Lai-a zawk hi kum 2021 atanga China-a Ministry of State Security-a lo thawk tawh a ni tih tar lan a ni.
US-in an ram enthlaa an puh Chinese pahnih man
