US-in China hrekna nasa zawkin kalpui

US President Joe Biden chuan executive order siamin chumi hmang chuan high-tech US -based investment te China lama kalpui tan a ni dawn a ni.
He thupek hmang hian advanced computer chips, micro electronics, quantum information technologies leh artificial intelligence te a huam tel vek a. Senior administration te chuan economic interests aia national security an ngaih pawimawh vang tia sawiin chuvanga hma la an nih thu an sawi zui a. He thupek hmang hian China in US investment leh a technology company te a hman theihna nasa taka khuahkhirhin a awm phah dawn a ni.
United States leh China te chu geopolitical competition lamah an inbei nasa hle zel a. Biden adminstration chuan China chu ‘dan tumna’ an nei lo an tichungin US chuan advanced computer chips lamah hrekin hei bakah hian President Donald Trump hun laia bungrua chawkluha chhiah laksan te pawh a ti zau zual zel zawk a. China pawhin a rama foreign company awmte a khuahkhirh nasa zual bawk.
Biden chuan China economy chuan harsatna a tawk mek tia sawiin khawvel huapa hmalak an tumna chu US-in Japan, South Korea, Australia leh European Union te nena inthlunzawmna a tihngheh zual avangin a talbuai phah mek a ti bawk a. Executive order siam hma hian admnistration chuan thawhpui ram leh industry te a be rawnsa vek an ti bawk.
“China ngaihven ula, China erawh hlauhthawng suh u” tiin Biden chuan June thla khan California a fundraising event neihnaah a lo sawi tawh a.
US officials te chuan China-in hun rei tak chhung chu US investment te chu a rama ralthuam leh military tihchangtlun nan a hmang tawh an ti a. Tuna ruahmanna an siam chu China economy tibahlah si lovin mahse nikum lam atanga advanced computer chips export control kalpui chhunzawmna zel a ni ang an ti a. US Treasury Department, investment enfiahtute chuan dan thar siamin chumi hmang chuan presidential order chu lekkawh a ni ang, an ti bawk.
Tuna executive order-in a tum ber chu China-a bungrua thawn luh turte chu US sorkar hriatttir vek zel a ni tawh dawn a, chubakah investment thenkhatte chu dan tur a ni bawk. Executive order chuan private equity, venture capital leh joint partnership te China-in additional knowledge leh military capability a neih belh phahna tur te a thlurbing bik dawn a ni.
J. Philip Ludvigson, lawyer leh Treasury official hlui chuan executive order chu framework thar tihlen zel theih a ni dawn a ti a. “He executive order hi US sorkar leh industry ten screening regime an kalpui intanna a ni” tiin a sawi a, “A tirah chuan executive order hian semiconductors leh microelectronics, quantum information technologies leh artificial intelligence te chauh a huam chungin a reiah chuan sector hrang hrangte pawh a huam ang,” tiin a sawi bawk.
He issue hi bipartisan policy a ni bawk a. July thla khan Senate-ah vote 91-6 a chak chungin National Defense Authorization Act amend in a awm tawh bawk a, hei hi China ramte ang laka investment kalpui dan enfiahna tur a ni.
Biden-a order siama China nasa zawka nawr tawm tumna hian thlawp a hlawh hle a, Republican Raja Krishnamoorthi, D-Ill chuan ‘tihmakmawh’ tia sawiin, “a tawpna tur a ni lo” a ti bawk a. Republican presidential candidate Nikki Haley, US-a US ambassador hlui ni bawk chuan Biden-an hei aia nazawkin hma a la tur a ni tia sawiin, “China critical technology leh military company tina US investment tihtawp vek zawk tur a ni bur,” tiin a sawi.
Biden hian China spy balloon US a kahhtlak a nih hnuah Xi Jinping chu ‘dictator’ tiin a lo sawi tawh bawk a. Taiwan dinhmun chu ram pahnih inbakkaihna ni reng a ni bawk a. China chuan kum 2022-a Russia in Ukraine a run chu a thlawp bawk a, ram pahnihte chu inbakkaih zui zel an ni.
Tuna US hmalakna avang hian mulitnational company te chuan China-a investment an tihah an tim hle tura ngaih a ni a, chu chuan China bikah nghawng a nei na hle tura ngaih a ni bawk.
Hetih lai chian China Commerce Ministry chuan US thutlukna siam chu an ngaihmawh takzet thu sawiin US hmalakna chhang let turin dikna an neih thu a sawi zui bawk a.
US chuan laws of market economy leh principle of fair compeititon zah se la, global economic leh trade exchange leh thawhhona tha tichhe zawngin hma la lo se an duhthu a sawi thung.
Pandemic lockdown hnuah China economic growth chuan tlakhniam lam pan zelin July thla khan consumer price pawh a hma kum aiin 0.3% in a hniam tih tarlan a ni a, consumer demand hniam chuan growth a khawih hle tura ngaih a ni a.
China-a foreign direct investment awh kumtir lam nena chhutin 89% lawihin a tlahniam tawh niin State Administration of Foreign Exchange data chuan a tarlang bawk.