US-in kuminah Indian 3,258 thawn haw tawh

US-in kuminah Indian 3,258 thawn haw tawh
US chuan kuminah Indian 3,258 a thawn haw tawh a, kum 16 chhunga a san ber tum a ni a. Kum 2009 atang khan mi 18,822 a thawn haw tawh niin sorkarin Rajya Sabha thutkhawm mekah a tar lang.
External Affairs Minister S Jaishankar-a chuan Ningania rorelnaah MP-te zawhna chhangin sorkar chuan US thuneitute hnenah Indian an thawn haw turte chu dik lo taka ti lo tur leh hmeichhia leh naupangte phei chu thlawhnaah an kut phuar leh thlung lo turin a ti tih a sawi a. September thlaa kum 73 mi, Harjit Kaur-a thawn haw tuma mihring intih dan tur phung lo taka an tih avang khan US hnenah an lawm loh thu pawh an thlen tih a sawi.
Jaishankar-a chuan sorkar laipui leh state sorkar chuan dan lova hnathawk zawng leh travel agent-te dap chhuah hna a thawk reng a, National Investigation Agency (NIA) pawhin mihringa sumdawnna thubuai 27 chhuiin mi 169 an man niin a sawi a. NIA-a mihringa sumdawnna bik chhui tura din division chuan kuminah Haryana leh Punjab-ah hetianga thil ti thin ‘mi pawimawh tak pahnih’ an man tih a sawi bawk.
Samajwadi Party MP Ramji Lal Suman-a zawhna ziaka a chhannaah Jaishankar-a hian January atanga November 28 thleng khan US-in Indian 3,258 a thawn haw tawh a. Heng zinga mi 2,032 hi sumdawng thlawhna pangngaia hawtir niin mi 1,226 erawh US Immigration & Customs Enforcement (ICE) emaw, Customs & Border Protection (CBP) emawten phur tur bik thlawhna an ruahman hmanga phurh haw an ni tih a tar lang.
Kumina US-in Indian a thawn haw hi kum 2009 hnua an tam ber tum niin kha mi kum khan mi 734 thawn haw an ni a. Kum 2016 khan mi 1,303 leh 2019-ah mi 2,042 thawn haw an ni a. A tlem zawnga kal zui zelin kum 2024 khan mi 1,368 thawn haw an ni.
Jaishankar-a chuan US-in mi a thawn hawte hi an rama dan lova lut te, visa hun tiam pela awm zui te, lehkha pawimawh kimchang nei lova US-a lo awm te, dan bawhchhiate an ni tih a sawi a. Indian sorkar chuan mi thawn haw turah hian US thuneitute thawhpuiin thawn haw an nih hmain Indian an ni ngei em tih finfiah hmasak vek an ni phawt thin tih a sawi.
Mihringa sumdawnna beihna kawnga hmalakna chungchang zawhna chhangin Jaishankar-a chuan NIA-in kuminah thubuai 27 a ziak lut a, mi 169 manin heng zinga 132 chu dan an bawhchhe ngei tih court-ah an thehlut tawh tih a sawi a. August 7-a mihringa sumdawnnna mi langsar pahnih an man bakah October 2-ah pahnih dang an man leh bawk tih a sawi.